Ж.Батжаргал: Жолоочийн даатгалын хэмжээг байж болох хамгийн өндөр дүнгээр тооцчихоод сенсацилаад байна

Жолоочийн хариуцлагын албан журмын даатгалын хураамж 2025 оны нэгдүгээр сарын 1-нээс нэмэгдсэн.

Тодруулбал, Санхүүгийн зохицуулах хорооны 2024 оны аравдугаар сарын 31-ний өдрийн 493 тоот тогтоолоор "Жолоочийн даатгалын хураамжийн хэмжээг тооцох итгэлцүүр хэрэглэх журам, "Жолоочийн хариуцлагын албан журмын даатгалын гэрээний мэдүүлгийн маягт", "Жолоочийн хариуцлагын албан журмын даатгалын гэрээний стандарт, загвар" зэргийг шинэчлэн баталжээ. Эдгээр журам 2025 оны нэгдүгээр сарын 1-нээс мөрдөгдөж эхэлсэн байна.

Энэ талаар Монголын даатгалын холбооны гүйцэтгэх захирал Ж.Батжаргалаас тодрууллаа. 

Тэрбээр "Цахим орчинд жолоочийн хариуцлагын даатгал нэг сарын 700,000 төгрөг болсон мэтээр сэвээд байна. Тийм зүйл байхгүй. Зам тээврийн осол зөрчил олон гаргаж байсан, жолоочийн тоог нь хязгааргүйгээр бүртгүүлж байгаа хүмүүсийн даатгалын төлбөр өндөр гарч байгаа. Түүнээс биш өнгөрсөн нэг жилийн хугацаанд осол зөрчил гаргаагүй, B ангиллын жолоочийн албан журмын даатгалын хэмжээ их өсөхгүй. Гэтэл хүмүүс үүнийг өлгөж аваад, сенсацилаад байна. 

Бид даатгалын компаниудад, гэрээ хийхдээ жолоочийн тоог "хязгааргүй" гэхгүйгээр нэрийг нь заахыг зөвлөж байгаа. Хязгааргүй гэдгийн цаана дуудлагын жолооч, найз нөхөд нь, ямар зөрчилтэй нь мэдэгдэхгүй хүмүүс жолоо бариад байна. Тийм учраас жолоочийн тоо олон байсан ч хамаагүй нэрийг нь бичих хэрэгтэй. 5 болон түүнээс дээш байхыг бид зөвшөөрчихсөн байгаа. Нэг хүний үнийн дүнгээр 10 хүнийг даатгаж байна. Өөрөөр хэлбэл, маш их боломж олгож байгаа гэсэн үг.

"Хязгааргүй" гэдэг заалтын үнийн дүн өндөр байгаагийн учир нь тухайн автомашиныг өмнө нь ямар зөрчил гаргаж байсан, хэн гэдэг хүн барихыг мэдэхгүй учраас хамгийн өндрөөр тооцдог юм.

Жишээ нь, би B ангиллын 2000 хүртэлх хөдөлгүүрийн багтаамжтай автомашинтай. Миний даатгалын төлбөр үсрээд л 70,000 төгрөг болж байгаа.

Улаанбаатарт түгжрэл нэмэгдэж, тэр хэрээр зам тээврийн осол гарах тохиолдлын тоо их болсон. Бас дундаж хохирлын хэмжээ ковидын үед 500,000-700,000 төгрөг байсан бол 1.2-1.3 сая төгрөг болоод нэмэгдчихсэн. Машины сэлбэг, хэрэгслийн үнэ ч өссөн. Тухайлбал, Prius 20 машины шинэ гүпер 2-3 дахин үнэтэй болсон. Үүнийг дагаад даатгалын хохирлын хэмжээ нэмэгдэж байгаа юм" гэлээ. 

Даатгалын хэмжээ тухайн даатгуулж буй компаниасаа хамаарч ялгаатай байхгүй гэдгийг мөн тэрбээр хэлсэн юм.