Хэв журам сахиулж буй алба хаагчдыг "харлуулдаг" байдлыг өөхшүүлэхээ зогсооё

"Бурханы хүү Баярбаатар" гэх хаягтай иргэн Б цахим орчинд бүдүүлэг, хараал бүхий үг хэллэгтэй бичлэг оруулсны улмаас 30 хоног цагдан хорих ялаар шийтгүүлсэн. Үүнийг цахим орчинд иргэд буруутгаж, хууль хүчний байгууллагыг хүний эрхэнд халдсан хэмээж буй. Гэтэл ганцхан иргэн Б ч гэлтгүй фейсбүүк орчинд илт зохисгүй үйлдэл гаргадаг иргэд олширсон. Сошиал медиа хэрэглэгчдийн тоо өнгөрсөн оны эхэнд 2.5 сая буюу  нийт хүн амын 72.0 хувьтай тэнцэж байсан. Ингээд харахад цахим орчинд нийтлэгдэж буй ёс бус хэллэг, бусармаг үйлдлийг бага насны хүүхдээс эхлээд том багагүй харж байгаа гэсэн үг. Энэ нь нийгмийн сэтгэлзүйд ч мөн сөргөөр нөлөөлдөг. 

Харин нөгөө талд нийгмийн хэв журмыг сахиулах үүрэг бүхий алба хаагчид эдгээр ёс суртахуунгүй үйлдэлтэй хуулийн хүрээнд тэмцэж байгаа ч эцэст нь хүний "эрхийн эсрэг" үйлдэлтэн болж хувирах нь элбэг болжээ.

Иргэд Үндсэн хуулиар олгогдсон үзэл бодлоо чөлөөтэй илэрхийлэх эрхтэй ч, үүрэг хариуцлага бас хүлээх ёстой. Нийгмийн олонх анхаарлаа хандуулж байдаг цахимд орчинд энэ мэт ёс бус мэдээлэл олшрох болсон нь тэр тусмаа бага насны хүүхдэд илүү сөрөг нөлөөг үзүүлдэг. Иймээс хуулийн хүрээнд нийгмийн хэв журмыг сахиж, хууль хэрэгжүүлж байгаа алба хаагч нарыг доромжилсон, харлуулсан байдлыг та, бид өөхшүүлж болохгүй.