Волейбол: Эрэгтэйчүүдийн Клубуудын ААШТ дөрөв хоногийн дараа эхэлнэ

Клубуудын Азийн аварга шалгаруулах волейболын тэмцээний эмэгтэйчүүдийн төрөл дөрөвдүгээр сарын 25-наас тавдугаар сарын 02-ны хооронд Вьетнамын Вин Фукт болж, өндөрлөсөн билээ. Уг тэмцээнд манай Үндэсний шигшээ багийн тамирчид “Хөвсгөл эрчим” клубын нэрээр оролцож, Хонгконгийн клубыг ялан наймдугаар байрт орсон юм. 

Тэгвэл Клубуудын Азийн аварга шалгаруулах тэмцээний эрэгтэйчүүдийн төрөл тавдугаар сарын 14-21-ны хооронд Бахрейны Риффа хотод болох гэж байна. Эл тэмцээнд манай үндэсний шигшээ баг “Bayankhongor Crownd Geo” нэрээр оролцоно. 

Тэмцээнд Бахрейн, Иран, Япон, Казакстан, Катар, Тайланд, Ирак, Афганистан, Хятад, Хонгконг, Өмнөд Солонгос, Австрали, Индонез, Кувейт, Йемен, Монгол гээд нийт 16 улсын баг оролцохоор мэдүүлжээ. 

Нэг хэсэг дөрвөн багтай бөгөөд манай баг C хэсэгт Японы (Suntory Sunbirds), Тайландын (Diamond Food–Fine Chef), Йемений (Khaypil) клубуудтэй орсон байна.

Манай баг эхний тоглолтоо тавдугаар сарын 14-нд монголын цагаар 16:30 цагаас Йемений (Khaypil) клубтэй хийнэ. 

Монгол Улсын Үндэсний шигшээ багийн бүрэлдэхүүнд,

• Ахлах дасгалжуулагчаар Б.Даринчулуун, 
• Туслах дасгалжуулагчаар Э.Энхтөгс,
• А.Даваажаргал, 
• Б.Анхбаяр,
• О.Золбоо,
• Б.Амар, 
• Т.Хангал, 
• Б.Наранбаяр,
• С.Нямсүх,
• С.Анх-Эрдэнэ,
• Б.Батсуурь,
• А.Төр-Эрдэнэ,
• З.Буянжаргал,
• Э.Энх-Амгалан,
• Г.Төрмандах, 
• Б.Ууганцэрэн,
• Г.Цэнд-Аюуш,
• О.Чойжилсүрэн нар багтсан билээ.

Мөн Ж.Энх-Эрдэнэ, Б.Баярсайхан нар үндэсний шигшээ багийн бүрэлдэхүүнд бий ч дөрөвдүгээр сард болсон Өмнөд Солонгосын волейболын дээд лигийн Ази тамирчдын сонгон шалгаруулалтад тэнцэж, Samsung Bluefangs, Ansan Okman багуудтай гэрээ байгуулсан билээ. Тиймээс тэд энэ удаагийн тэмцээнд оролцох эсэх нь тодорхойгүй байна.