Хан-Уул дүүргийн хоёрдугаар хорооны нутаг дэвсгэр дэх “Ажилчны алдар” талбайг дүүргийн хөрөнгө оруулалтаар орчин үеийн стандартад нийцүүлэн шинэчлэн тохижуулахаар болжээ.
Тодруулбал, талбайн тохижилт, засвар, шинэчлэлт хийхтэй холбогдуулан тус талбайд байрладаг 10 гаруй түргэн үйлчилгээний цэгүүдийг нүүлгэн шилжүүлж, талбайг өнөөдөр (2023.06.21) чөлөөлөөд байгаа юм.
Талбайн тохижилт, угсралтын ажлыг “Хан Блү” ХХК гурван сарын хугацаанд гүйцэтгэн, ашиглалтад хүлээлгэн өгөх бөгөөд орчин үеийн стандартад нийцүүлэн сэргээн засварлаж, шинэчлэн тохижуулах аж.
Цаашид эко дүүргийн нутаг дэвсгэр дэх нийтийн эзэмшлийн гудамж талбайг дүүргийн Засаг даргын захирамжаар үе шаттай тохижуулж, шинэчилнэ гэж Хан-Уул дүүргийн ЗДТГ-аас мэдээлжээ.
