“Улаанбаатар-2023” Зүүн Азийн залуучуудын наадам Монгол Улсын нийслэл Улаанбаатар хотноо наймдугаар сарын 16-нд эхэлсэн билээ. Спортын 12 төрлөөр зохион байгуулагдах тус наадам энэ сарын 23-ныг хүртэл үргэлжлэх юм.
Тэмцээний волейболын эмэгтэйчүүдийн шигшээ тоглолтууд өчигдөр /2023.08.21/ явагдаж дууслаа.
Алтан медалийн төлөөх тоглолтод БНХАУ, Монголын багууд өрсөлдсөн юм. Хятадын баг тус тоглолтод 3:0 харьцаатай хожиж тэмцээний аварга боллоо.
Тодруулбал,
- Нэгдүгээр үе – БНХАУ 25:18 Монгол
- Хоёрдугаар үе – БНХАУ 25:16 Монгол
- Гуравдугаар үе – БНХАУ 25:17 Монгол гэсэн харьцаагаар тоглолт өндөрлөв.
Ингээд манай эмэгтэйчүүд мөнгөн медалийн болзол хангасан юм.
Сануулахад, Монголын эмэгтэй баг 2012 онд БУСО-д болсон Оюутны Азийн аварга шалгаруулах тэмцээнд мөнгөн медаль хүртсэн. Үүнээс хойш олон улсын тэмцээнээс медаль хүртээгүй байсан юм.