Алслагдсан аймаг, орон нутгийн иргэдэд эрт илрүүлгийн үзлэг шинжилгээ, оношилгоог оновчтой, үр дүнтэй зохион байгуулахад мэргэжил арга зүйн дэмжлэг үзүүлэх зорилгоор Улсын гуравдугаар төв эмнэлгийн явуулын баг наймдугаар сарын 19-нөөс 27-ны хооронд Завхан, Говь-Алтай аймагт ажиллажээ.
Эрт илрүүлгийн багийг ахалсан УГТЭ-ийн дэд захирал О.Батгэрэл Завхан, Говь-Алтай аймагт ажилласан талаар дараах товч мэдээллийг өглөө.
-Манай багийнхан Завхан, Говь-Алтай аймагт дотрын эмчийн үзлэгийг 222 хүнд, бөөр, диабетийн эмчийн үзлэг 344 хүнд, хэвлий, хөх, бамбайн ЭХО шинжилгээ 259 хүнд, ходоод, улаан хоолойн дурангийн шинжилгээг 110 хүнд, зүрхний эмчийн үзлэг 694 хүнд, зүрхний цахилгаан бичлэг 694 хүнд тус тус хийж орон нутгийн эрт илрүүлэх үзлэг оношлогоонд дэмжлэг үзүүлж ажиллалаа.
Орон нутагт хийгдсэн эрт илрүүлгийн үзлэгээр элэгний хавдрын хоёр, бамбайн хавдарын нэг, хөхний хавдрын нэг, ходоодны хожуу үеийн хавдрын нэг тохиолдлыг илрүүлж, хавдрын сэжигтэй хоёр тохиолдолд эдийн шинжилгээ хийлгэх, 13 тохиолдолд ургацаг авахуулах талаар нарийн мэргэжлийн эмч зөвлөгөө өгч, цаашид нарийвчилсан онош тодруулах шинжилгээ хийлгэх, эмчилгээний асуудалд дэмжлэг үзүүлэх боломжтойг танилцууллаа.
.jpg)
Мөн дээрх аймгуудын Нэгдсэн эмнэлгийн удирдлага, эрт илрүүлэг хариуцсан эмч мэргэжилтнүүдтэй уулзан Эрүүл мэндийг дэмжих төвийн зохион байгуулалт, эрт илрүүлгийн явц, тулгамдаж буй асуудал, эрт илрүүлэгт ажиллаж байгаа эмч мэргэжилтнүүдийг сургаж чадавхжуулах талаар харилцан санал солилцлоо.
Үүний үр дүнд Завхан аймгийн эрт илрүүлэг хариуцсан эмч наймдугаар сарын 28-наас УГТЭ-т аймгийн иргэдийнхээ эрт илрүүлгийг эрчимжүүлэхэд урьдчилан сэргийлэлт, эрт илрүүлгийн оновчтой зохион байгуулах чиглэлээр тав хоногийн дадлагажих сургалтад хамрагдаж эхэлсэн байна.
А.САЙХАН
