БНСУ-ын Бусан хотод тэргэнцэртэй сэлэмний 23 хүртэлх насны залуучуудын Дэлхийн аварга шалгаруулах тэмцээн (ДАШТ) эхэллээ. Тус тэмцээнд Монгол Улсаас “Монгол алдар” сургуулийн тамирчин Д.Цолмон, “Мобиком корпораци” компанийн тамирчин Ж.Нарантунгалаг нар оролцохоор болжээ.
Тодруулбал, Монголын тэргэнцэртэй сэлэмний холбооноос энэхүү тэмцээнд ганцаарчилсан болон багийн төрөлд найман тамирчин бэлдэж байсан ч зургаан тамирчны виз гараагүйн улмаас ийнхүү хоёр тамирчин оролцуулж байгаа юм.
Монгол тамирчид энэ сарын 27-ны өдөр Бусан хотод очсон бөгөөд тэмцээний өмнөх олон улсын бэлтгэлдээ хамрагдаж байгаа аж. Манай багийн ерөнхий дасгалжуулагчаар М.Мөнхтулга ажиллаж байгаа бол шүүгч Б.Гэрэлмаа олон улсын шүүгчийн эрх авахаар тус тэмцээнийг зорьжээ.
Монгол Улс тамирчдын оролцох төрөл есдүгээр сарын 2-ны өдөр эхэлж, 4-ний өдөр тулалдана.
А.САЙХАН
