УИХ-ын чуулганы өнөөдөр (2023.10.06)-ийн нэгдсэн хуралдаанаар Хүүхдийн эрхийг хамгаалах тухай хуулийн хэрэгжилт, хүүхдийн эрхийг хамгаалах асуудлаар Хөдөлмөр, нийгмийн хамгааллын сайд Х.Булгантуяагийн мэдээллийг сонслоо.
УИХ-ын дарга Г.Занданшатар хүүхдийн эрхийг хамгаалсан эрх зүйн орчныг бүрдүүлэх, энэ чиглэлээр баталсан Хүүхдийн эрхийн тухай, Хүүхдийн эрхийг хамгаалах тухай зэрэг хууль, тогтоол цөөнгүй байна. Гэсэн хэдий ч хуулийн хэрэгжилт хангалтгүй байгаа тул хэрэгжилтийг хангах асуудалд зарим шинэчлэлийг хийх шаардлагатайг онцлов.
Хүүхэд хамгааллын үйлчилгээний санхүүжилтийг жил бүр нэмэгдүүлж,
2021 оноос тогтмол 8.0 тэрбум төгрөг төсөвлөн хэрэгжүүлж байна
Хөдөлмөр, нийгмийн хамгааллын сайд Х.БУЛГАНТУЯА:
-Монгол Улсын хүн ам 3.4 сая болж, өмнөх оноос 1.4 хувиар өсөж, нийт хүн амд 18 хүртэлх насны хүүхдийн эзлэх хувь 36.2 буюу 1.2 сая хүүхэд байна. Монгол Улсад 2022 оны байдлаар 941,5 мянган өрх бүртгэгдэж, өмнөх онтой харьцуулахад 2.3 хувиар өссөн.
Улсын хэмжээнд 2022 оны байдлаар 65090 эх амаржиж, 67874 хүүхэд төрүүлсэн нь өмнөх оноос амаржсан эх 8.5 хувиар, төрсөн хүүхэд 8.1 хувиар тус тус буурчээ.
Улсын хэмжээнд 2022-2023 оны хичээлийн жилд 1413 цэцэрлэгт 266.024 хүүхэд, төрийн болон хувийн өмчийн 859 ерөнхий боловсролын сургуульд 746.405 хүүхэд суралцаж буй.
Бүтэн өнчин 2911, хагас өнчин хүүхэд 36.363, үрчлэгдсэн хүүхэд 1478 байна. Нийгмийн халамжийн дэмжлэг туслалцаа зайлшгүй шаардлагатай өрхөд амьдарч байгаа 460344 хүүхэд буюу нийт хүүхдийн 35.4 хувь байна. Хүнсний эрхийн бичигт 76063 хүүхэд, хүүхдийн мөнгөн тэтгэмжийг бүх хүүхдэд олгож байНа.
Хүүхэд, гэр бүлийн салбарт мөрдөгдөх 50 гаруй дүрэм, журам, стандартыг баталж, хэрэгжилтийг ханган ажиллаж байна. Хүүхэд хамгааллын үйлчилгээний зардлыг үе шаттай нэмсэн гэж байлаа. Хүүхдийн тусламжийн 108 утасны үйлчилгээний төвийн үйл ажиллагааг өргөжүүлж, төрийн үйлчилгээний бүтэц болгож, программын гуравдугаар шатны шинэчлэлийг хийж, утас, чат, мессэжээр дуудлага, мэдээлэл хүлээн авч байна.
2017 оноос хүчирхийллийн хохирогчид аюулгүй байдлын хамгаалалт, хүүхэд хамгааллын үйлчилгээ үзүүлэх нэгжийг тав дахин нэмэгдүүлж, 20 түр хамгаалах байр, 15 нэг цэгийн үйлчилгээний төв ажиллаж байна. Улсын хэмжээнд 737 хамтарсан багт 6008 гишүүн ажилладаг.
Хүүхдийн эрхийн хууль зүйн хороог шинэчлэн байгуулж, 30 хорооны 514 гишүүн холбогдох дүрэм, журмын хэрэгжилтийг ханган ажиллаж байна. Хүүхэд, гэр бүлийн салбарт хүүхдийн эрхийн зөрчлийг шалган шийдвэрлэх эрх бүхий улсын байцаагчийг бэлтгэж, 36 албан хаагч давхар чиг үүрэгтэй ажиллаж байна.
Хүүхдийн эрх, хамгааллын чиглэлээр ажилладаг төрийн бус байгууллагын магадлан итгэмжилж, 2018 оноос хүүхэд хамгааллын үйлчилгээг төрийн бус байгууллагаар гэрээлэн гүйцэтгүүлж эхэлсэн.
Хүүхэд хамгааллын үйлчилгээний шинэчлэлийг хийж тодорхой үр дүнд хүрсэн хэдий ч тулгамдсан зарим асуудал байсаар байна. Нийгэмд гарч байгаа хүүхдийн эсрэг хүчирхийллийн 70 гаруй хувь нь гэр бүлийн орчинд эцэг, эх, асран хамгаалагч, харгалзан дэмжигчийн зүгээс үйлдэгдсэн байна.
Хүүхдийн тусламжийн утсанд өнгөрсөн онд 117000 дуудлага мэдээлэл, энэ оны есөн сарын байдлаар 78310 дуудлага, мэдээлэл хүлээн авсан. Түүнчлэн цахим орчин дахь хүүхэд хамгааллыг сайжруулах шаардлагатай байгаа.
ITU, Дэлхийн эрүүл мэндийн байгууллагаас гаргасан зөвлөмжид хүүхдийн өдөрт интернэтэд зарцуулах хугацааг 120 минутаас ихгүй байлгахыг зөвлөдөг. Гэвч 13-18 насны хүүхдийн нийгмийн сүлжээ ашиглахад зарцуулж буй дундаж цаг 231 минут байна.
Хөгжлийн бэрхшээлтэй хүүхдийн хөгжил, хамгаалал, асрамж, дэмжлэг, ээлтэй орчин бүрдүүлэх асуудлыг хойш тавилгүй шийдвэрлэх зайлшгүй шаардлагатай байгааг дурдаад улсын хэмжээнд байнгын асаргаа шаардлагатай, хөгжлийн бэрхшээлтэй 11,818 хүүхэд байна.
Улсын хэмжээнд 21 байгууллагын 30 асрамж, халамжийн төв үйлчилгээ үзүүлж, 18 хүртэлх насны 974 хүүхэд, 19-21 насны 86 залуу үйлчилгээ авч байна. Нийт хүүхдийн 8.1 хувь нь буюу 86 хүүхэд хөгжлийн бэрхшээлтэй. Хөгжлийн бэрхшээлтэй хүүхдийн сэргээн засах хөгжлийн төвд төрөлжсөн асрамжийн үйлчилгээнд 130 хүүхэд, Хүүхдийн төв сувилалд хүнд хэлбэрийн хөгжлийн бэрхшээлтэй хүн 19-34 насны хүн өнөөг хүртэл амьдрах тохиолдол байна.
БШУЯ-ны мэдээллээр, 2022-2023 оны хичээлийн жилд 7171 хүүхэд ерөнхий боловсролын сургуульд сурч байна. Хөгжлийн бэрхшээлтэй хүний хөгжлийн төвийг таван аймагт байгууллаа. Хөгжлийн бэрхшээлтэй хүний эрхийн тухай хуулийн шинэчилсэн найруулгын тухай хуулийн төслийг боловсруулж байна.
Хүүхдийн хөгжил, оролцоог дэмжсэн орчин бүрдүүлэх, үйлчилгээний хүртээмжийг нэмэгдүүлэх шаардлагатай байгааг сайд мэдээлэлдээ дурдаад хүүхдийн хөгжлийн үйлчилгээний хүртээмж бага, 5-18 насны нийт хүүхдийн 12 хувь нь хөгжлийн үйлчилгээнд хамрагдаж байна.
Улсын хэмжээнд ерөнхий боловсролын сургуулийн дэргэд 532 дотуур байранд 35077 хүүхэд амьдарч байна. Ерөнхий боловсролын сургууль дотроо спорт заалгүй 201 сургууль, урлагийн заалгүй 446 сургууль байна.
Өнгөрсөн онд улсын хэмжээнд 135 сургууль буюу 20,7 хувь нь хүүхэд тээвэрлэх автобустай, 515 сургууль огт автобусгүй байсан бол энэ оны байдлаар улсын хэмжээнд 292 сургууль хүүхэд тээвэрлэх автобустай болжээ. Үүнээс төрийн өмчийн 72 сургууль, төрийн бус өмчийн 220 сургууль автобустай.
Төрийн өмчийн ерөнхий боловсролын 650 сургуулиас 560 нь гадна камертай, огт камергүй 90 сургууль байх бөгөөд дотор камертай 589 сургууль, огт камергүй ерөнхий боловсролын 61 сургууль байна.
Засгийн газрын шийдвэрээр өнгөрсөн оноос цэцэрлэгийн хүртээмжийг нэмэгдүүлсэн нь бага насны хүүхдийн хөгжих, хараа хяналттай байх, эцэг, эх ажлаа хийх боломжийг бүрдүүлсэн. Түүнчлэн Засгийн газрын тусгай сангийн тухай хуулийн нэмэлт, өөрчлөлтөөр Хүүхдийн төлөө санг сэргээн байгуулж, уг санд 2023 оны аравдугаар сарын 5-ны өдрийн байдлаар 12,8 тэрбум төгрөгийн орлого төвлөрүүлээд байна.
Мөн Хүүхэд хамгааллын үйлчилгээний санхүүжилтийг жил бүр нэмэгдүүлж, 2021 оноос тогтмол 8.0 тэрбум төгрөг төсөвлөн хэрэгжүүлж буй. Хүүхэд хамгааллын хөтөлбөрийн зардлын 2022-2023 оны төлөвлөлтийг авч үзэхэд, хамгаалах нөхөн сэргээх үйлчилгээний зардалд 2022 онд 3,883 тэрбум, 2023 онд 5,7 тэрбум, шуурхай тусламж үйлчилгээний зардалд 2022 онд 467 сая, 2023 онд 348 сая, урьдчилан сэргийлэх зардалд 2022 онд 3,075 тэрбум, 2023 онд 1,8 тэрбум төгрөг тус тус хуваарилсан.
Хүүхэд хамгааллын хөтөлбөрийн зардлын зарцуулалтад аудит хийхэд холбогдох хууль, журмыг мөрдөөгүй, гүйцэтгэлд суурилсан зардлын төлөвлөлт хийдэггүй, санхүүгийн сахилга бат сул зэрэг хэд хэдэн зөрчил гарсан. Цаашид холбогдох хууль, журмыг мөрдүүлэх, хариуцлага тооцох, алдаа зөрчлийг арилгуулахад онцгой анхаарч ажиллана.
2024 оны Төсвийн тухай хуулийн төсөлд хүүхэд хамгааллын үйлчилгээний зардлыг нэмэгдүүлж, 14.3 тэрбум төгрөгийг тусгаад байна. Үүний зэрэгцээ Хүүхэд хамгааллын тухай хуулийн шинэчилсэн найруулгын тухай хуулийн төслийг Гэр бүлийн тухай хуулийн шинэчилсэн найруулгатай уялдуулж, УИХ-д өргөн мэдүүлэхээр, цаашлаад Хүүхэд харах үйлчилгээний тухай хуулийг шинэчлэн найруулахаар ажиллаж, холбогдох судалгаа, шинжилгээг хийж, хэлэлцүүлгүүд өрнүүлж байна.
Хүүхдийн эрх, хамгааллын талаар цаашид авах арга хэмжээний талаар салбарын сайд мэдээлэлдээ, Хүүхэд, гэр бүлийн салбарт хүний нөөцийн тогтвортой байдал алдагдсан, цалин урамшуулал, нийгмийн баталгааны хөтөлбөр хэрэгжүүлэх ажлууд хийгдээгүй өнөөг хүрснийг дурдаад сум, хорооны хамтарсан багийн гишүүдийн 60 гаруй гаруй хувь нь солигдож, зарим хороо, суманд нийгмийн ажилтангүй, хүүхэд, гэр бүлд үйлчилгээ үзүүлэх ажил орхигдож байгааг онцолсон.
Иймд хүүхэд, гэр бүлийн салбарын хүний нөөцийн тогтвор суурьшилтай ажиллах нөхцөл боломжийг бүрдүүлэх, гадаад, дотоодын урт, богино хугацааны сургалтад хамруулж мэргүүлэх, нийгмийн баталгааны хөтөлбөр хэрэгжүүлэх, аймаг сумдын Засаг дарга хуулиар хүлээсэн үүргээ биелүүлж, нийгмийн ажилтны тогтвортой ажиллах нөхцөлийг бүрдүүлэх, олон нийтийг соён гэгээрүүлэх, нөлөөллийн үйл ажиллагааны стратегийг боловсруулж боловсрол, соёлын байгууллагатай хамтран хэрэгжүүлэх,
Хүүхдийн эрхийн мэдээллийн нэгдсэн санг хөгжүүлэх, хүүхдийн цахим бүртгэлийн санг хөгжүүлэх, эцэг, эх, асран хамгаалагчдын үүрэг хариуцлагыг сайжруулах, гэр бүлийн боловсрол олгох хөтөлбөрийг насан туршийн боловсролоор дамжуулан олгох, хүүхэд, өсвөр үеийнхэнд гэр бүлийн боловсрол олгох ажлыг үе шаттайгаар зохион байгуулах,
төрөөс олгож буй нийгмийн халамжийн тэтгэмж, хүүхдийн мөнгөн тэтгэмжийг олгохдоо “хүүхдийн эрх, хамгааллын сургалтад хамрагдсан байх” шалгуурыг тусгаж, хэрэгжүүлэх, өрхийн шилжилт хөдөлгөөний мэдээллийг бүрэн цахимжуулж, бусад үйлчилгээний сантай холбох, үүрэн холбооны оператор компаниудтай хамтран “Хүүхдийн дугаарын бүртгэл” аяныг үндэсний хэмжээнд зохион байгуулах,
Монгол Улсад түгээмэл хэрэглэгддэг нийгмийн сүлжээний платформын аюулгүй байдлын болон нууцлалын тохиргоо хийх зааварчилгааг монгол хэл дээр гаргах, бүх шатны соёлын байгууллагаар дамжуулан хэрэгжүүлэх хүүхдийн сэтгэл зүйн онцлог, чадварт нийцсэн хөгжлийг дэмжих соёлын олон талт бодлого, арга хэмжээний төлөвлөгөө батална гэв.
Мөн өсвөр насны хүүхэд, залуучуудын сэтгэцийн эрүүл мэнд, амиа хорлоход хүргэж буй хүчин зүйлийг тодорхойлж, эрсдэлийг бууруулах, хүүхэд, эхчүүдэд эрүүл мэндийн тусламж, үйлчилгээ, үзлэг оношилгоог хийхдээ хүчирхийлэлд өртсөн эсэхэд ажиглалт, хяналт тавьж ажиллах, шаардлагатай гэж үзвэл мэргэжлийн байгууллагад холбон зуучлах талаар эрүүл мэндийн салбарын эмч, ажилтнуудын ойлголт, мэдлэгийг сайжруулж, хариуцлагыг нэмэгдүүлэх,
шинээр баригдаж буй барилга, байгууламж болон замын засвар, үйлчилгээг стандартын дагуу хийж гүйцэтгүүлэхэд хяналт тавьж, хүүхэд, иргэдийн аюулгүй байдлыг ханган ажиллах, нийтийн эзэмшлийн гудамж, зам, талбай, хүүхдийн тоглоомын талбай, орон сууцны гэрэлтүүлэг, цахилгааны сүлжээний аюулгүй байдалд хяналт шалгалтын ажлыг зохион байгуулж, шаардлагатай засвар үйлчилгээг хийх,
барилгын цонх Ерөнхий шаардлага MNS 5802:2007 стандартад далавчны нээгдэх хувилбаруудад хүүхэд унаж гэмтэх, амь насаа алдахаас сэргийлсэн хязгаарлалтыг тогтоож, онгойлгох хэмжээг нарийвчлан тусгах, хамгаалалт тор байрлуулах зохицуулалтыг нэмж тусгах, байгууллагуудад Эцэг, эхийн зөвлөлийг байгуулан, Хүүхэд хамгааллын бодлогыг хэрэгжүүлж, хүүхдийн эрх, хамгаалал, нас, сэтгэхүйн болон хөгжлийн онцлог, хүмүүжлийн эерэг арга, гэр бүлийн харилцаа зэрэг сэдвүүдээр сургалт, сонсголыг тогтмол зохион байгуулж хэвшүүлэх арга хэмжээ авна.
Түүнчлэн замын далан, ухсан нүх, суваг, шуудуу, траншей, худаг орчимд анхааруулах тэмдэг байршуулах, таглаж битүүлэх, эрсдэл бүхий орчныг камерын хяналтын системээр бүрэн хангах, сургууль, цэцэрлэг, нийтийн эзэмшлийн биеийн тамирын болон хүүхдийн тоглоомын талбайн тоног төхөөрөмж, тоглоом хэрэгсэлд засвар үйлчилгээ хийх орчны гэрэлтүүлгийг сайжруулж, ажлыг зохион байгуулна.
Нийгмийн хариуцлагын хүрээнд зорчигч хүүхдийн аюулгүй байдлыг хангах, тайван зорчих нөхцөлийг бүрдүүлэх зорилгоор UB CAB такси үйлчилгээний компанитай хамтран ажиллаж, хууль тогтоомжийн дагуу такси үйлчилгээг камержуулах ажлыг тодорхой үе шаттайгаар нэвтрүүлнэ гэдгийг сайд мэдээлэлдээ дурдлаа.
Гишүүд хүүхдийн эрхийг хамгаалах хууль эрх зүйн орчны хувьд нь сайжруулах, Эрүүгийн хуульд хүүхдийн эрхийг зөрчсөн, аюулгүй байдлын эсрэг гэмт хэргийн ялын бодлогыг чангатгах нь чухал гэхийн зэрэгцээ Засгийн газраас өнгөрсөн парламентын үед өргөн мэдүүлээд татаж авсан Гэр бүлийн тухай хуулийн төслийг яаралтай өргөн мэдүүлж хэлэлцүүлэхэд Хууль зүй, дотоод хэргийн яам анхаарах,
УИХ-ын эмэгтэй гишүүдээс 2021 онд өргөн барьсан Хүүхэд хамгааллын тухай хуулийг хэлэлцүүлэх нь зүйтэй гэсэн саналтай байлаа. Түүнчлэн иргэдээ ажилтай, орлоготой болгох, орлогыг нь нэмэгдүүлэх, өрх тэргүүлэх залуучуудаа гэр бүлээ аваад явах чадавхтай, сэтгэлийн тэнхээтэй, амьдралын зорилго мөрөөдөлтэй болгох, эмэгтэйчүүдийн суурь асуудлыг шийдэж, эх болоход нь бэлтгэх асуудлыг цогцоор нь шийдвэрлэхгүйгээр нийгмийн болон хүүхэд хамгааллын асуудлыг шийдэж чадахгүй.
Нөгөөтэйгүүр, 2017 оноос хойш УИХ-аас хүүхэд хамгааллын төсвийг жил бүр нэмэгдүүлэн урсгал зардалтайгаа нийлүүлэн 12 тэрбум төгрөг төсөвлөхийн зэрэгцээ хууль тогтоолыг ч цөөнгүй баталсан тул салбарын яам зохион байгуулалт, зохицуулалт ажлын уялдаа, холбоогоо сайжруулах, эрчимжүүлэх шаардлагатай. Иймд салбарын яам цаашдаа асуудалд урт хугацааны цогц бодлого гарган, анхаарч ажиллах шаардлагатай.
“Хүүхдийг зодож гэмтээсэн, хүнд гэмтэл учруулсан этгээдүүдэд оноох
ялын бодлогыг чангаруулах хэрэгтэй”
УИХ-ын гишүүн С.ОДОНТУЯА:
-Хүүхдээ хамгаалж чадахгүй улс орон өөр юугаа хамгаална гээд үндэсний аюулгүй байдал ярих билээ? Монгол Улсад өдгөө хүчин төгөлдөр үйлчилж байгаа хууль 1999 онд батлагдсан. Эцэг, эхийн хариуцлагыг нэмэгдүүлэх талаар Гэр бүлийн тухай хуульд маш тодорхой заалтууд ороод явж байгаа. Хүүхдийг зодож гэмтээсэн, хүнд гэмтэл учруулсан этгээдүүдэд оноох ялын бодлогыг чангаруулах хэрэгтэй. Бидний баталсан хүүхдийн эрхийн байцаагч нар хүүхдийн төлөө шүгэл үлээж байх ёстой.
Хүүхэд харах үйлчилгээний хуулиа эргэж харах цаг болсон байна
Боловсрол, шинжлэх ухааны сайд Л.ЭНХ-АМГАЛАН:
-Хүүхэд харах үйлчилгээний хуулиа эргэж харах цаг болсон байна. Энэ үйлчилгээнд хэнийг хамруулах, хэн байх, төсөв мөнгө нь юу байхыг боловсруулах хэрэгтэй. Өнгөрсөн удаагийн чуулганаар бид цэцэрлэгт хүүхэд хамрагдах насыг 3-5 байсныг 2-5 болгосон. Өсвөр насны хүүхдийн цогц хөтөлбөрийг боловсруулахад ХНХЯ, Эрүүл мэндийн яам, БШУЯ-ын уялдаа холбоо, хамтын ажиллагаа хэрэгтэй. Хөгжлийн бэрхшээлтэй 11800 хүүхдийн асуудлыг энд мартаж болохгүй. Тэдний 60 хувь нь ямар нэгэн байдлаар сургууль, цэцэрлэгийн үйлчилгээг авч, үлдсэн хувь нь хүнд хэлбэрийн бэрхшээлтэй байна. Хүүхэд харах үйлчилгээг улам боловсронгуй болгосноор тэдэнд тусламж, дэмжлэг үзүүлж чадна.
“12-той охиныг хөнөөсөн хэргийн сэжигтэнд бүх насаар нь хорих ял өгөөд, магадлангаар оруулж, өршөөл үзүүлээгүй бол энэ хэрэг гарахгүй байсан”
УИХ-ын гишүүн Д.САРАНГЭРЭЛ:
-Бага насны хүүхдийг хүчирхийлсэн гэмт хэрэгтэнд өршөөл үзүүлдэггүй, магадлангаар оруулдаггүй байх, бүх насаар нь хорьдог байх хуулийн хатуу заалтаа хийе. Хуучин бүх насаар нь хорих ялын дээд хэмжээ 25 байсан нь одоо 20 жил болгочихсон. Хэрэв энэ 12 настай охины хэрэгт сэжиглэгдэж байгаа хэрэгтэнд бүх насаар нь хорих ялыг нь өгөөд, магадлангаар оруулж, өршөөл үзүүлээгүй бол энэ хэрэг гарахгүй байсан.
“Ялын бодлогыг чангатгахад айхтар цочиж савж болохгүй,
шинжлэх ухааны үндэстэй хандах ёстой”
Хууль зүй, дотоод хэргийн сайд Б.ЭНХБАЯР:
-Хүүхдийн хүчирхийлэлтэй холбоотой асуудлыг УИХ-ын чуулганд бараг анх удаа шахуу өндөр түвшинд өргөн бүрэлдэхүүнээр олон талаас нь ярьж байна. Сүүлийн таван жилийн байдлаар 10 хүүхэд амь насаа алдсан 300 орчим хүүхэд гэмтэж бэртсэн. Олон хүчин зүйл нөлөөлж байгаа. Ялын бодлогыг чангатгахад айхтар цочиж савж болохгүй, шинжлэх ухааны үндэстэй хандах ёстой.
Хүчирхийлэлд өртсөн хүүхдийн зураг хөргийг гаргахыг тэвчдэггүй. Ийм гэмт хэргийн талаар дэлгэрэнгүй мэдээллэх хэрэггүй. Хүүхдийн хүчирхийллийг сурталчилж байгаа нэг ч хүнийг битгий тэвч.
Хүүхдийн эсрэг хүчирхийлэл үйлдсэн хүнд өршөөл үзүүлэхгүй, магадлангаар суллахгүй байхыг заасан хуулийг УИХ-д өргөн барьсан байгаа. Үүнийг шууд батлая. Бага насны хүүхдийг бэлгийн мөлжлөгт өртүүлсэн хүнд торгох ял оноохоор одоогийн хуульд заасан байгаа. Үүнийг шууд хорих ял болгож чангатгая.
“1996-2020 оны хооронд 17 хүүхэд сураггүй болсны хоёр нь гэмт хэргийн улмаас алга болсон байж болзошгүй”
ЦЕГ-ын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн дарга, цагдаагийн хошууч Г.МӨНХБАЯР:
-1996-2020 оны хооронд 17 хүүхэд сураггүй болсны гэмт хэргийн улмаас алга болсон байж болзошгүй хоёр хүүхэд байгаа. Тодруулбал, Сэлэнгэ болон Дорноговь аймагт бүртгэгдсэн. 14 хүүхэд нь ахуйн ослоор буюу төөрөх, усанд осолдох зэргээр сураггүй болсныг тасралтгүй эрэн сурвалжилж байна. Эрэн сурвалжлах ажиллагааны нарийн журмыг Цагдаагийн байгууллагад батлан хэрэгжүүлдэг. Тухайлбал, бага насны хүүхэд сураггүй болсон тухай мэдээллийг бүртгэгдсэн даруйд нь эрэн хайх ажиллагааг хэрэгжүүлдэг.
Хүүхдийн эрхийн асуудлаар нээлттэй сонсгол зохион байгуулахыг холбогдох байнгын хороонд даалгав
Хуралдааны төгсгөлд УИХ-ын дарга Г.Занданшатар хэлсэн үгэндээ, хүүхдийн эрх, хамгааллын асуудлаар УИХ сүүлийн хоёр жилийн турш удаа дараагийн сонсгол хэлэлцүүлгийг зохион байгуулж, УИХ, Байнгын хорооны холбогдох тогтоолуудыг баталж ирснийг тодотгоод, өнөөдөр үүний хэрэгжилтийг хангаж ажиллах нь чухал байна гэв.
Мөн УИХ-ын гишүүн Ц.Мөнхцэцэг, Б.Баярсайхан нараас гаргасан саналын дагуу Хүүхдийн эрхийн асуудлаар нээлттэй сонсгол зохион байгуулахыг холбогдох байнгын хороонд даалгав.
Э.ЭГШИГЛЭН
