Израиль албан ёсоор дайны байдалд шилжжээ. Тус улсын Ерөнхий сайдын ажлын албанаас гаргасан мэдэгдэлд “Өчигдөр орой Цэрэг-улс төрийн кабинет хуралдаж, дайны байдалд шилжиж, үүний дагуу цэргийн томоохон ажиллагаа явуулах асуудлыг хэлэлцэн баталлаа. Энэ нь Үндсэн хуулийн 40 дүгээр зүйлд нийцэж байгаа юм. Израиль улсад тулгасан “дайн”, Газын зурваст үхлийн аюултай террорист халдлага 2023 оны аравдугаар сарын 7-ны 6:00 цагт эхэлсэн” гэж дурджээ.
Израиль Газын зурвас дахь 426 объектод цохилт өгчээ
Израилийн нисэх онгоцууд Газын зурвас дахь 426 объектод цохилт өгсөн тухай Израилийн Батлан хамгаалах хүчний төлөөлөгч Даниел Хагаригийн хэлснээс иш татан “Times of Israel” сонин мэдээлэв. Цохилтод өртсөн объектуудын дунд Палестины ХАМАС хөдөлгөөний хонгил, дэд бүтэц, мөн Исламын Жихад бүлэглэл байгааг тэмдэглэжээ.
Амиа алдсан оршин суугчдын тоо 700 давав
ХАМАС-ын дайчид Газын зурвасаас хил зөрчиж гэнэтийн дайралт хийснээс хойш нэг өдрийн дараа Израильд амиа алдсан хүний тоо 700 гаруй болж нэмэгдлээ гэж Израилийн Батлан хамгаалах хүчний хэвлэлийн төлөөлөгч, хошууч Бен Валхаус өнгөрсөн Ням гарагт CNN агентлагт ярьжээ.
Мөн Израиль-Палестины мөргөлдөөн хурцдаж, Израиль дахь ХАМАС бүлэглэлийн халдлагын улмаас Израилийн 700 гаруй оршин суугч амиа алдлаа гэж “i24 News” суваг мэдээлжээ.
Ням гаргийн өглөө “Haaretz” хурцадмал байдлын улмаас 600 гаруй хүн амиа алдсан гэж мэдээлж байв.
Байден Нетаньяхуд эхний ээлжийн цэргийн тусламж
Израиль руу илгээхээ мэдэгдэв
АНУ-ын Ерөнхийлөгч Жо Байден Израилийн Ерөнхий сайд Биньямин Нетаньяхуд Америкийн цэргийн нэмэлт тусламж Еврей улсад очно гэж хэлснийг Цагаан ордны хэвлэлийн мэдээнд дурджээ.
Нетаньяху, Байден хоёр Израилийн өмнөд хэсэгт ХАМАС бүлэглэлийн дайралтын үеэр хоёр удаа утсаар ярьсан байна.
АНУ Ойрхи Дорнодод илүү олон сөнөөгч онгоц байрлуулж байна
АНУ Ойрхи Дорнодод АНУ-ын хүчний байр суурийг бэхжүүлэх төлөвлөгөөний нэг хэсэг болгон Ойрхи Дорнодод илүү олон сөнөөгч онгоц байрлуулж байна гэж төлөвлөгөөг мэддэг АНУ-ын албаны хүн CNN агентлагт ярьжээ.
Тэрбээр АНУ энэ хүрээнд агаар-агаар, агаар-газар хоорондын хамгийн хүчирхэг F-35, F-15 сөнөөгч онгоцуудаа илгээнэ” гэж хэлсэн байна. Нисэх онгоцны нарийн тоо тодорхойгүй байгаа ч тус бүс рүү 20-25 сөнөөгч нисгэх магадлалтай юм байна.
Албаны хүн “Сөнөөгч онгоцууд нэмэлтээр байршуулах зорилго нь Ираны аливаа түрэмгийлэл, Израилийн хилийн гадна байлдааны ажиллагааг өргөжин тэлэхээс сэргийлэх явдал юм” гэж хэлжээ.
Орос улс Израиль, Палестиныг галаа зогсоож, хэлэлцээрийн ширээнд
суухыг уриалав
ОХУ-ын Гадаад хэргийн дэд сайд Михаил Богданов “Орос улс Израиль, Палестиныг галаа зогсоож, хэлэлцээрийн ширээнд суухыг уриалж байна” гэж “РИА Новости” агентлагт мэдэгджээ.
Нутаг дэвсгэрийн маргаантай холбоотой Палестин-Израилийн мөргөлдөөн олон арван жилийн турш бүс нутагт хурцадмал байдал, тэмцлийн эх үүсвэр байсаар ирсэн. 1947 онд ЗСБНХУ-ын идэвхтэй үүрэг бүхий НҮБ-ын шийдвэрээр Израиль, Палестин гэсэн хоёр улс бий болох нь тодорхой болсон боловч зөвхөн Израилийг бий болгосон.
Израилийн зэвсэгт хүчин Баруун эрэг дэх тосгон руу довтлов
Палестин-Израилийн мөргөлдөөн хурцдаж байгаа энэ үед Израилийн цэргүүд Баруун эрэг дээрх Женин хотоос баруун зүгт орших тосгонд нэвтэрч, тэнд цэргийн пост байгуулсан тухай Палестины WAFA агентлаг мэдээлэв.
Тус агентлаг аюулгүй байдлын агентлагууд дахь эх сурвалжаасаа иш татан тэмдэглэснээр, Израилийн цэргүүд тус бүсэд самнах ажиллагаа явуулж, цэргийн хяналтын цэг байгуулжээ.
Палестины удирдагч дэлхий нийтийг Израилийн асуудалд яаралтай
оролцохыг уриалав
Палестины Ерөнхийлөгч Махмуд Аббас олон улсын хамтын нийгэмлэгт хандан Израилийн асуудалд яаралтай оролцохыг уриалсан гэж WAFA мэдээлэв.
Тус агентлаг мэдээлэлдээ “Ерөнхийлөгч Израилийн засгийн газарт Газын иргэдийг ус, цахилгаан, хоол хүнс зэрэг үндсэн баялгаас нь салгалаа. Тэрээр олон улсын хамтын нийгэмлэгт яаралтай оролцож, Палестины ард түмний өмнө хүлээсэн хууль ёсны үүргээ биелүүлэхийг Израилийн эзлэн түрэмгийлэгч эрх баригчдаас шаардахыг уриалав. Израилийн бүслэлт, дайны үр дагавраас болж хүмүүс зовж шаналж байна” гэж бичжээ.
Аббас Палестины эрх баригчдад боломжтой бүх нөөцөө Газын зурвасын ард түмэнд яаралтай илгээхийг даалгасан байна.
ХАМАС бүлэглэл Израиль руу 2000 гаруй пуужин харважээ
ХАМАС бүлэглэл аравдугаар сарын 7-ны өглөө Израиль руу 2000 гаруй пуужин харвасны улмаас дор хаяж зургаан хүн амь үрэгдэж, олон зуун хүн шархадсан талаар CNN өмнө нь мэдээлсэн. Илүү олон хүн хохирох магадлалтай бөгөөд Палестины дайчид энгийн иргэдийг устгаж буй бичлэгийг олон нийтийн сүлжээгээр нийтэлжээ. Үүний зэрэгцээ ХАМАС-ын гишүүд Израилийн хэд хэдэн хотод нэвтэрч, олон арван хамгаалалтын хүчнийг олзолсон байна.
Эх сурвалж: CNN, RIA NOVOSTI
Э.ЭГШИГЛЭН
