Боловсрол шинжлэх ухааны сайд болон ажил хариуцсан бусад хүмүүс өчигдөр /2023.10.10/Улаанбаатар хотод үйл ажиллагаа явуулж буй зарим тусгай сургууль, цэцэрлэгт ажилласан байна.
Үүнтэй холбогдуулан дараах мэдээллийг өглөө. Тодруулбал,
“29 дүгээр сургууль 640 хүүхдийн багтаамжтай байртай. Энд өнөөдөр 273 хүүхэд хичээллэж байна. Сурагчдын дийлэнх нь ажлын 5 өдөр сургуулийнхаа дотуур байранд байрладаг. Дотуур байр болон сургуулийн дээврийг засварлахаар шийдвэрлэлээ.
116 дугаар сургуулийн тухайд харааны бэрхшээлтэй 130 хүүхэд суралцаж байна. Сургуулийнхаа дээд давхрыг дотуур байрны хэлбэрээр ашигладаг. Энд 54 хүүхэд амьдарч байна. Технологийн дэвшлийг хичээл сургалтад ашиглах шаардлагатай. Тиймээс брайль дисплейгээр хангахыг хүслээ.
25 дугаар сургуульд ажиллах үеэр 63, 70, 55 дугаар сургуулийн удирдлагатай хамтарсан уулзалтыг зохион байгуулсан. Оюуны бэрхшээлтэй хүүхэдтэй ажилладаг багш нарын тухайд гүйцэтгэлийн үнэлгээний аргачлалыг дахин шинэчлэх талаар саналууд хэлж байлаа. Энэ сургуулиудаас энгийн сургууль руу хүүхэд шилждэг боловч эргээд ирэх тохиолдол олон байдаг.
Сүүлийн жилүүдэд хавсарсан бэрхшээлтэй хүүхдийн тоо нэмэгдэж байгааг сургууль бүрийн удирдлага хэлж байна.
Дээрх сургуулиудын тухайд нийтлэг хэд хэдэн асуудлыг хөндөж байгаа юм.
- Багш болон багшийн туслахын хүрэлцээг сайжруулах. Туслах багшийн орон тоо, цалин байгаа боловч хүн ирдэггүй байна.
- Нэг хичээлийн үргэлжлэх цагийг шинэчлэх
- Бүлэг дүүргэлтийг багасгаж, стандартыг шинэчлэх
- Тусгай сургуулиудад түшиглэн хөгжлийн бэрхшээлтэй хүүхэдтэй ажиллах энгийн сургуулийн багш нарыг чадавхжуулах
- Хүнд хэлбэрийн бэрхшээлтэй буюу 100 хувь хараагүй, сонсголгүй, оюуны бэрхшээл нь хүнд хүүхдүүдийг ялангуяа бага ангид нь тусгай сургуульд хамруулах зэрэг юм.
Ойрын үед бусад сургуульд ажиллах бөгөөд тусгай сургуульд ажилладаг багш нарын нэгдсэн уулзалтыг зохион байгуулахаар боллоо” гэв.
Х.ТҮШИГ
