УИХ-ын чуулганы өнөөдөр (2023.10.12)-ийн нэгдсэн хуралдаан үргэлжилж байна. Хуралдаанаар аймаг, нийслэл, сум дүүргийн Сонгуулийн тухай хуульд өөрчлөлт оруулах тухай хуулийн төслийг хэлэлцэх эсэх асуудлыг хэлэлцэж буй юм.
Энэ үеэр УИХ-ын дэд дарга С.Одонтуяа “Иргэдээс гомдол санал их ирж байна. Жишээлбэл, манай Баянгол дүүрэг гэхэд Засаг даргагүй найман сар боллоо. Хорооны Засаг дарга нар нь 3-4 удаа солигдсон байна. Хороонд ажил мэддэг хүн алга.
Уг нь бол хуулиар, хорооны иргэд нь өөрсдөө хуралдаад даргаа сонгодог. Гэтэл нэг ч хорооны даргыг иргэдээс сонгохгүй, бүгдийг нь намын дарга нь “үүрэг гүйцэтгэгч” гэх нэрээр томилж байна. Энэ үүрэг гүйцэтгэгч нар нь ажилдаа ирдэггүй” хэмээн шүүмжлэв.
Х.ТҮШИГ