Израилийн арми Газын зурваст агаараас өгөх цохилтоо эрчимжүүлж байгаагаа мэдэгдэж, энгийн иргэдийг зурвасын хойд хэсгийг орхихыг дахин уриалжээ. Өнгөрсөн Ням гарагт Палестины нутаг дэвсгэрт Израилийн цэргүүд ХАМАС бүлэглэлийн дайчидтай мөргөлдсөн байна.
Газын зурваст өнгөрсөн Ням гарагт нэн шаардлагатай тусламжийн хоёр дахь цуваа нэвтэрсэн бөгөөд нэг нь “цуст өдөр” болж буйг тайлбарлаж, нөгөө нь цахилгаан, түлшний хомсдолын улмаас эмчилгээ хийх боломжгүйд хүрч байгаа тухай мэдэгджээ.
Эх сурвалжийн мэдээлснээр, АНУ барьцаанаас олон хүнийг аварч, хүмүүнлэгийн тусламж үзүүлэхийн тулд Израилийн хуурай замын довтолгоог хойшлуулахыг эрмэлзэж байгаа аж.
АНУ болон Катар өдгөө “Хамас” бүлэглэлийн барьцаанд буй 200 гаруй хүнийг суллахаар хүчин чармайлт гаргаж байгаа ч Израилийн өндөр албан тушаалтан CNN-д “Гал зогсоохгүй” гэж мэдэгджээ.
Израилийн дайралтын улмаас Газын зурваст нэг шөнийн дотор олон арван хүн амиа алдсан талаар Палестины эмч нар болон Газын яамны албаны хүмүүс CNN агентлагт мэдэгджээ.
Газын хойд хэсэгт: Израильчууд Жабалиа дүрвэгсдийн хуаранд цохилт өгсний улмаас дор хаяж 26 хүн амь үрэгдлээ гэж Газа дахь Индонезийн эмнэлгийн захирал Атеф Аль Кахлоут CNN-д ярьжээ. Жабалиа нь Газын хамгийн том дүрвэгсдийн хуарангуудын нэг аж.
Газын өмнөд хэсэгт: Газын Эрүүл мэндийн яамны хэвлэлийн төлөөлөгч Ашраф Аль Кидрагийн мэдээлснээр, Рафах хотод дөрвөн байшин цохилтод өртөж, 29 хүн амиа алдсан байна.
Бүх газар хохирол учирсан: Газ дахь Палестины Дотоод хэргийн яам “Нэг шөнийн дотор Рафах, Хан Юнис, Төв Газ болон Газа хот дахь барилгууд, тэр дундаа хэд хэдэн орон сууцны байшингууд руу дайрсан” гэж мэдэгдэв. Мөн тус хотын Кудс эмнэлгийн ойролцоо “хүнд цохилт” болсон талаар мэдээлжээ.
Израилийн батлан хамгаалах хүчин өнгөрсөн Ням гарагийн орой мэдэгдэл хийж, “Газ дахь Хамас бүлэглэлийн олон арван объектод цохилт өгсөн” гэж мэдэгдсэн ч нэмэлт тодруулга өгөөгүй байна.
Газын зурвасын ойролцоох Израилийн Сдерот хотод: CNN-ийн сурвалжлагч Ник Робертсоныг мэдээлснээр, өнгөрсөн Ням гаригт өгсөн цохилт Газын хойд хэсэг хамгийн хүчтэй туссан байна.
Израилийн цэргийн хүчнийхэн өнгөрсөн Бямба гаригийн орой “ХАМАС-ын эсрэг тэмцлийн “дараагийн үе шат”-д бэлтгэж байгаа бөгөөд цэргүүд Газын зурваст агаарын довтолгоогоо эрчимжүүлнэ” гэж мэдэгджээ.
Эх сурвалж: CNN
Э.ЭГШИГЛЭН
