Хоёр хүүхэд гэмтээж, долоон машин мөргөсөн иргэн Ч.Маралмаад холбогдох хэргийн шүүх хурал хоёр удаа хаойшилсны эцэст өнөөдөр /2023.03.06/ боллоо.
Яллагдагчийн зүгээс шүүх хурлыг хойшлуулах санал гаргасан ч, шүүх хүлээж аваагүй аж.
Улмаар түүнд тээврийн хэрэгсэл жолоодох эрхийг гурван жилээр хасаж, Хан-Уул дүүргээс гадагш зорчих эрхийг хоёр жил хязгаарлахаар шийдвэрлэжээ. Мөн нэг сая 700 мянган төгрөгийн мөнгөн торгууль оногдуулсан байна.
Хэргийг эргэн сануулахад, Ч.Маралмаа нь 2022 оны аравдугаар сарын 10-ны өдөр Баянзүрх дүүргийн 26 дугаар хороо, “Олимп” хотхоны хойд замд “Toyota Landcruiser 200” маркийн тээврийн хэрэгслийг жолоодон замын хөдөлгөөнд оролцохдоо Монгол Улсын Замын хөдөлгөөний дүрмийн 3.7, 12.3, 11.5-т заасан заалтуудыг тус тус зөрчсөний улмаас эсрэг урсгал сөрөн 7 автомашин мөргөсөн.
Мөн явган хүний замаар явж байсан 12 настай С, Э нарыг дайрч, эрүүл мэндэд нь хохирол учруулсан гэх хэрэгт Эрүүгийн хуулийн 27.10 дугаар зүйлийн 2 дахь хэсгийн 2.2, 2.4 дэх хэсэгт зааснаар /Авто тээврийн хэрэгслийн хөдөлгөөний аюулгүй байдал, ашиглалтын журам зөрчих/ яллах дүгнэлт үйлдэн, Баянзүрх дүүргийн эрүүгийн хэргийн анхан шатны шүүхэд шилжүүлсэн юм.
