ХАМАС бүлэглэлийн засгийн газар “Аравдугаар сарын 7-ноос хойш Газын бүс дэх барилга байгууламжуудын 61 хувь нь сүйдсэн” гэж мэдэгджээ. Хэвлэл мэдээллийн албаны ажилтан Мягмар гарагт Газаас хийсэн хэвлэлийн бага хурал дээр дайнд 305000 барилга байгууламж өртсөнөөс 52000 нь бүрэн сүйдэж, 253000 нь эвдэрсэн талаар мэдээлсэн байна.
Газар дээрх үйл явдал: Израилийн батлан хамгаалах хүчин Мягмар гарагт Газын өмнөд хэсэгт байрлах хотыг бүсэлж байгаагаа мэдэгдэв. Улмаар Газын төв хэсэгт орших Дейр аль-Балах дүүрэгт хэд хэдэн удаагийн цохилт өгч, олон хүний амь хохирч, шархадсан хүмүүсийг Аль-Акса хотын Мартирс эмнэлэгт хүргэснийг дүрс бичлэг болон гэрчүүдийн мэдүүлэг нотолжээ.
Израилийн Ерөнхий сайд Биньямин Нетаньяху Мягмар гарагт хэлэхдээ, Газын зурвасын аюулгүй байдлыг олон улсын хүчин хариуцна гэсэн санааг үгүйсгэж, “Дайны дараа Газын зэвсгийг хураах хяналтыг Израилийн зэвсэгт хүчинд хэвээр үлдээх ёстой” гэж мэдэгдсэн байна.
АНУ-ын албаны хүмүүс Газын зурвасын өмнөд хэсэгт чиглэсэн Израилийн хуурай замын ажиллагаа ирэх оны нэгдүгээр сард ч үргэлжилнэ гэж үзэж буй талаар CNN-д ярьжээ.
Барьцаалагдсан хүмүүс: Израилийн олон нийтийн “Channel-11” өмнө нь барьцаалагдсан хүмүүс болон Израилийн аюулгүй байдлын албаны хооронд хийсэн уулзалтын бичлэгийг хүлээн авчээ. Аудио бичлэгт хуучин барьцаанд байсан хүмүүс хэрхэн олзлогдож, ямар нөхцөл байдалд байсан талаар дэлгэрэнгүй өгүүлсэн байна. Түүнчлэн Израилийн зарим барьцаалагдсан хүмүүсийг суллахын өмнө сэтгэл түгшилтийн эсрэг эм өгсөн гэж Израилийн Эрүүл мэндийн яамны ажилтан Мягмар гарагт Кнессет буюу парламентад мэдэгджээ.
Ливаны байр суурь: Израиль болон ХАМАС хоорондын мөргөлдөөний улмаас бүс нутагт хурцадмал байдал үүсэхээс болгоомжилж байгаа тул Ливаны Ерөнхий сайдыг түр орлогч улс орноо “болзошгүй томоохон дайнаас” аврахыг хүсч байгаагаа хэлжээ. Үүний зэрэгцээ Мягмар гаригт Израилийн дайралтын улмаас Ливаны нэг цэрэг амиа алдаж, гурван хүн шархадсан гэж Ливаны арми олон нийтийн сүлжээгээр дамжуулан мэдэгдсэн байна.
Эх сурвалж: CNN
Э.ЭГШИГЛЭН
