“Нүүрсний хулгай”-н нотлох баримтыг шинжлэн судлах нээлттэй сонсгол өнөөдөр (2023.12.07) гурав дахь өдрөө үргэлжилж байна.
Сонсголын үдээс хойших хэсгээр “Эрдэнэс Тавантолгой” ХК-ийн тендер сонгон шалгаруулалтын мэдээллийг судалж байна.
“Хишиг арвин индустриал” ХХК хөрс хуулалт, олборлолтын найман тендерт шалгарч, “Эрдэнэс Тавантолгой” ХК-тай нийт 1 их наяд 441 тэрбум төгрөгийн гэрээ байгуулжээ. Ингэхдээ тус компани зөрчилтэй тендер ирүүлж, улмаар түүнийг нь “Эрдэнэс Тавантолгой” ХК шалгаруулсан байна. Энэ асуудалтай холбогдуулан “Хишиг арвин индустриал” ХХК-ийн Ерөнхий захирал Б.Хишигдоржийг гэрчээр дууджээ.
Түр хорооны гишүүн М.Оюунчимэг: Шүүх хурлын явцаас харахад “Эрдэнэс Тавантолгой” ХК-ийн Гүйцэтгэх захирлаар ажиллаж байсан Б.Ганхуягтай холбоотой асуудалд та болон танай компанийн нэр дурдагдаж байсан. Энэ ямар асуудал байсан бэ?
“Хишиг арвин индустриал” ХХК-ийн Ерөнхий захирал Б.Хишигдорж: Манай компанийг хуулийн байгууллагаас шалгаж байна. Олон жил тендер авсан гэдэг утгаар шалгаж байгаа юм болов уу л гэж бодсон. Мөрдөн шалгах ажиллагааны хүрээнд гарын үсэг зурсан учир би нарийн мэдээллийг энд ярьж болохгүй байна. Гэхдээ энэ асуудал үнэн зөвөөр шийдэгдэнэ гэж найдаж байна.
Түр хорооны дарга Б.Энхбаяр: Та яллагдагчаар татагдчихсан юм уу, хүү чинь татагдсан юм уу?
“Хишиг арвин индустриал” ХХК-ийн Ерөнхий захирал Б.Хишигдорж: Манай хүү ч татагдсан. Би ч татагдсан.
Б.Энхбаяр: Ямар хэрэгт татагдсан бэ?
Б.Хишигдорж: Яг тэр, энэ гэсэн зүйл байхгүй. Нэг удаа байцаагаад, түүнээс хойш янз бүрийн юм ярьж болохгүй шүү гээд, гарын үсэг зуруулсан.
Б.Энхбаяр: Хэргийн явц руу орж асуухгүй. Бусдад хээл хахууль өгөх гэдэг зүйл ангиар яллагдчихаад байгаа юу?
Б.Хишигдорж: Нарийн мэдэхгүй байна.
Б.Энхбаяр: Хэргийн явц руу орохгүй гээд байна. Ямар зүйл ангиар яллагдсан бэ гэдэг нууц биш шүү дээ. Та болон таны хүү ямар зүйл ангиар буруутгагдаж, яллагдагчаар татагдсан бэ гэж асуулаа?
Б.Хишигдорж: Миний хүүтэй холбоотой учраас энэ талаар нарийн яримааргүй байна. Үнэхээр мэдэхгүй.
Б.Энхбаяр: “Эрдэнэс Тавантолгой” ХК-ийн удирдлагуудад хахууль өгсөнтэй холбоотой асуудал мөн үү?
Б.Хишигдорж: Тэгж ойлгож болно. Гэхдээ хахууль өгөөгүй.
Х.ТҮШИГ
