Украины тал Оросын армитай тэмцэхэд шаардлагатай, АНУ-аас авахыг хүсч буй зэвсгийн хамгийн сүүлийн жагсаалтдаа пуужингийн довтолгооноос хамгаалах THAAD систем, “F-18 Hornet” сөнөөгч онгоц, нисгэгчгүй онгоц, “Apache”, “Black Hawk” нисдэг тэргүүд багтаасан талаар “Reuters” мэдээлжээ.
Украины Батлан хамгаалах яамны албаны хүмүүс өнгөрсөн Лхагва гарагт Вашингтонд засгийн газрын албан тушаалтнууд болон батлан хамгаалах салбарын удирдлагууд оролцсон бага хурлын хаалттай хуралдааны үеэр “Украины батлан хамгаалах хүчний хэрэгцээг хангах зэвсгийн жагсаалт”-ыг танилцуулсан байна.
Энэхүү жагсаалтдаа Украины тал “Abrams” танк, 155 миллиметрийн их буу, мөн F-16, нисгэгчгүй онгоц, алсын тусгалын ATACMS пуужин зэрэг зэвсгүүд багтаажээ.
Улмаар тус жагсаалтад “Boeing” (BA.N) компанийн үйлдвэрлэсэн “C-17 Globemaster” тийрэлтэт онгоц, “Lockheed Martin” (LMT.N) компанийн үйлдвэрлэсэн “C-130 Super Hercules” зэрэг томоохон тээврийн хэрэгслүүд ч багтаж байгаа аж.
Мөн “Боинг” компанийн довтолгооны “Apache” нисдэг тэрэг, “Lockheed Martin”-ийн “Sikorsky” нэгжийн хийсэн “Black Hawk” нисдэг тэрэг ч жагсаалтад буй юм байна.
Гэхдээ украинчуудын жагсаалт үүгээр зогсоогүй аж. Украин улсад мөн F-18 “Hornet” сөнөөгч онгоц, “General Atomics” компанийн үйлдвэрлэсэн “MQ-9B Sky Guardian”, “Lockheed” компанийн пуужингийн довтолгооноос хамгаалах THAAD систем зэрэг гурван төрлийн нисгэгчгүй онгоц шаардлагатай байгаа гэжээ.
Украинчууд тулалдааныг үргэлжлүүлэхийн тулд барууны орнуудаас цэргийн тусламж авахаас аргагүй. Гэвч АНУ-ын Сенат өнгөрсөн Лхагва гарагт Бүгд найрамдахчууд АНУ-ын Мексиктэй хиллэдэг цагаачлалын хяналтыг чангатгахыг шаардсан тул Украин, Израилийн аюулгүй байдлын чиглэлээр олон тэрбум ам.долларын тусламж үзүүлэх тухай хууль, тогтоомжийг хоригложээ.
Эх сурвалж: REUTERS
Э.ЭГШИГЛЭН
