УИХ-ын гишүүн асан Т.Аюурсайхан, “Эрдэнэс Тавантолгой” ХК-ийн Гүйцэтгэх захирал асан Б.Ганхуяг нарын 11 хүнд холбогдох хэргийн гэм буруугийн шүүх хурал энэ сарын 13-нд буюу ирэх Лхагва гарагт Чингэлтэй дүүргийн Эрүүгийн хэргийн анхан шатны шүүхэд болно.
Тодруулбал, тэдэнд холбогдох хэргийн шүүх хурал өнгөрөгч есдүгээр сарын 28-нд болох товтой байсан ч Б.Ганхуягийн биеийн байдал муу, гуравдугаар шатлалын эмнэлэгт хэвтэн эмчлүүлэх шаардлагатай гэж үзсэн тул нэг сарын хугацаагаар хойшлуулсан юм.
Сануулахад, Нүүрсний хэргийг хянан шалгах УИХ-ын түр хорооноос зохион байгуулж буй хяналтын сонсголын эхний шатанд Б.Ганхуягийг гэрчээр дуудсан боловч оролцуулаагүй. Шалтгааныг нь ХЗДХ-ийн сайд Б.Энхбаяр “Түүнийг гэрчээр дуудах тогтоолыг миний бие шүүх, прокурорын байгууллагад хүргүүлсэн.
Гэвч тэр шүүхийн шийдвэрийн дагуу цагдан хоригдож байгаа тул сонсголд оролцуулах боломгүй гэсэн. Шүүхийн шийдвэрийг хэн ч өөрчлөх боломжгүй” хэмээсэн юм. Мөн энэ үеэр Б.Ганхуягийн эгч, нөхрийн хамт мэдээлэл хүргэж, Б.Ганхуягийг хордлогод орсон талаар хэлсэн билээ.
Б.Ганхуяг, Т.Аюурсайхан нар хоёр дахь шатны сонсголд гэрчээр дуудагдаад байна.
Х.ТҮШИГ