УИХ-ын гишүүн асан Т.Аюурсайхан, “Эрдэнэс Тавантолгой” ХК-ийн Гүйцэтгэх захирал асан Б.Ганхуяг нарын 11 хүнд холбогдох хэргийн гэм буруугийн шүүх хурал өнөөдөр (2023.12.13) Чингэлтэй дүүргийн Эрүүгийн хэргийн анхан шатны шүүхэд болно.
Тэдэнд холбогдох хэргийн шүүх хурал өнгөрөгч арваннэгдүгээр сарын 13-нд болох товтой байсан ч Б.Ганхуягийн биеийн байдал муу, эмнэлэгт хэвтэн эмчлүүлэх шаардлагатай байсан тул нэг сараар хойшлуулсан юм.
Сануулахад, Нүүрсний хэргийг хянан шалгах УИХ-ын түр хорооноос зохион байгуулж буй хяналтын сонсголын эхний шатанд Б.Ганхуягийг гэрчээр дуудсан боловч оролцуулаагүй. Шалтгааныг нь ХЗДХ-ийн сайд Б.Энхбаяр “Түүнийг гэрчээр дуудах тогтоолыг миний бие шүүх, прокурорын байгууллагад хүргүүлсэн.
Гэвч тэр шүүхийн шийдвэрийн дагуу цагдан хоригдож байгаа тул сонсголд оролцуулах боломгүй гэсэн. Шүүхийн шийдвэрийг хэн ч өөрчлөх боломжгүй” хэмээсэн юм. Мөн энэ үеэр Б.Ганхуягийн эгч, нөхрийн хамт мэдээлэл хүргэж, Б.Ганхуягийг хордлогод орсон талаар хэлсэн билээ.
Харин хоёр дахь шатны сонсголд Б.Ганхуяг, Т.Аюурсайхан нар дуудагдсан бөгөөд оролцох эсэх нь тодорхойгүй байна.
Х.ТҮШИГ
