Энэ сарын 13-14-нд шилжих шөнө Увс, Завхан, Хөвсгөл, Архангайн зарим сумдын нутгаар шөнөдөө -34-өөс 46 градус хүрч хүйтний эрч чангарах төлөвтэй байгаа. Мөн цаг агаарын урьдчилсан мэдээгээр энэ сарын 15-18-ны өдрүүдэд цаг агаар эрс хүйтэрч яармаг, их сонгинын орчимд шөнөдөө 40-42 хүрч хүйтэрнэ. Улаанбаатар хотын төв хэсгээр өдөртөө 26-28 хэм, шөнөдөө 30-32 хэм хүрч хүйтэрнэ. Хүйтний эрч арван хоёрдугаар сарын 20-н хүртэл сулрахгүй гэж Цаг уур, орчны шинжилгээний газраас мэдээлээд байна.
Тэгвэл эдгээр өдрүүдэд манай улсын ОХУ-аас авдаг импортын цахилгаан тасалдах сурагтай. Арван хоёрдугаар сарын 13-ны өдрөөс импортын цахилгаан чадлыг 345МВт авах боломжтой байсныг 150МВт хүртэл хэмжээнд өгөх болсон талаар мэдээлэл цацагджээ. ОХУ –ын цахилгаан станцын нэг блокд гэмтэл гарсан мөн Сибирьт эрс хүйтэрсэн зэргээс шалтгаалан ийнхүү цахилгааны хязгаарлалт хийх болсон аж.
Эх сурвалжуудын мэдээлснээр Сэлэнгэ аймгийн зарим сумдад цахилгаан хэрэглээг хязгаарлаад эхэлжээ. Өдөрт 2-3 удаа цахилгааны хязгаарлалт хийж эхэлсэн ба нам даралтаар халдаг айл өрх, аж ахуй нэгж, сургууль цэцэрлэгийг нөөц генератор, мотор, шатахуун зэргийг нөөцөлж бэлэн байдалд байхыг нутгийн удирдлага болон “Цахилгаан түгээх сүлжээ-Орхон” хэсэг оршин суугчдад анхааруулсан байна. Хөхөө өвлийн энэ хатуу цагт ийнхүү хойд хөрш цахилгаанаа хязгаарласнаар сургууль цэцэрлэгийн багачууд, малчид, ард иргэдийн амьдралд ихээхэн хүндрэл үүсэх бололтой.
Иймд Эрчим хүчний яамны болон харьяа байгууллагууд өндөржүүлсэн бэлэн байдалд шилжиж хариуцлагатай жижүүр томилон 24 цагаар жижүүрлэж ажиллахаар болжээ. Энэ талаар Засгийн газрын ээлжит хуралдаанд одоо яригдаж байгаа бөгөөд эцсийн шийдвэр мэдээллийг удахгүй иргэд, олон нийтэд мэдээлэх юм.
Бид хойд урд хөршөөсөө бүрэн хараат эдийн засагтай. Гэтэл одоо байдал улам хүндэрлээ. Нүүрсний хулгайчид, элдэв улс төрийн дээрэм тонуулаа ч шийдэж чадаагүй сонсгол хийж олон сар жил явж байх хооронд ард иргэд нь шатахуун ч үгүй, цахилгаан ч үгүй өвөлжих боллоо. Дөнөн үхрийн эвэр хуга хөлддөг өвлөөр бид гэр байшингүй хаяагаа манаж, галаа түлж амь зогоох болох вий.
Уг асуудлын талаар бид баттай эх сурвалжийн мэдээллийг дахин хүргэх болно.
А.САЙХАН
[…] цахилгаан тодорхой хугацаагаар тасалдах болсон тухай мэдээлэл цацагдсан. […]