Хятадын удирдагч Ши Жиньпин Сан Францискод болсон АПЕК-ийн дээд хэмжээний уулзалтын үеэр АНУ-ын Ерөнхийлөгч Жо Байдентай уулзаж, “Бээжин Тайванийг эх газрын Хятадтай нэгтгэнэ” хэмээн “шууд” хэлжээ. Энэ талаар АНУ-ын одоогийн болон өмнө нь ажиллаж байсан гурван албан тушаалтны мэдээллээс иш татан NBC агентлаг мэдээлсэн байна.
Мэдээлэлд дурдсанаар, Хятадын удирдагч Америк, Хятадын албаны хүмүүсийн оролцсон уулзалтын үеэр АНУ-ын Ерөнхийлөгчид “Бээжин арлыг хүчээр бус, харин энх тайван замаар буцаан нэгтгэхийг илүүд үзэж байна” гэж хэлжээ. Үүнээс гадна Ши Жиньпин Хятад улс 2025, эсвэл 2027 онд Тайванийг “эзлэн авах” төлөвлөгөөтэй байгаа гэсэн АНУ-ын армийнхны таамаглалыг дурдаад, түүнийг няцаасан байна.
1949 онд БНХАУ-ын Коммунист намтай хийсэн иргэний дайнд ялагдсан Гоминданы арми Тайваньд шилжсэнээр БНХАУ-ын төв засгийн газар болон түүний арлын муж хоорондын албан ёсны харилцаа тасалджээ. Арал болон эх газрын Хятад хоорондын бизнесийн болон албан бус харилцаа 1980-аад оны сүүлээр сэргэсэн байна.
Өнгөрсөн оны наймдугаар сарын эхээр АНУ-ын Конгрессын Төлөөлөгчдийн танхимын тэргүүн Нэнси Пелоси тус аралд айлчилсны дараа Тайваний эргэн тойронд байдал нэлээд хурцадсан. Арлыг өөрийн мужуудын нэг гэж үздэг Хятад улс энэ алхмыг Тайванийн салан тусгаарлах үзлийг дэмжиж, улмаар томоохон хэмжээний цэргийн сургуулилт хийсэн гэж үзэн, албаны хүний айлчлалыг буруушаасан билээ.
БНХАУ-ын Төрийн зөвлөлийн дэргэдэх Тайваний хэрэг эрхлэх газрын төлөөлөгч Чен Бинхуа өнгөрсөн арваннэгдүгээр сарын сүүлээр “Хятад улс тус аралтай энх тайвнаар нэгдэх өргөн боломжийг бүрдүүлэхэд бэлэн байгаа хэдий ч “тусгаар тогтнол” руу чиглэсэн салан тусгаарлах үйл ажиллагаа явуулахыг зөвшөөрөхгүй” гэжээ.
Тайванийн засаг захиргааны тэргүүний сонгууль 2024 оны нэгдүгээр сарын 13-нд болох юм байна.
Эх сурвалж: NBC
Э.ЭГШИГЛЭН
