УИХ-ын Төрийн байгуулалтын байнгын хороо өнөөдөр (2023.01.02) хуралдаж байна. Хуралдаанаар Сонгуулийн ерөнхий хорооны гишүүнд нэр дэвшигчийн сонсголыг хийж байна.
Хуралдааны эхэнд УИХ-ын гишүүн Н.Энхболд “Сонгуулийн төв байгууллагын тухай хуульд заасны дагуу СЕХ-ны гишүүн Ж.Болд, Б.Ганбат нар тус албан тушаалаас чөлөөлөгдөх хүсэлтээ албан бичгээр ирүүлсэн.
Хуулийн дагуу СЕХ-ны тавыг нь УИХ-ын ТББХ, хоёрыг Монгол Улсын Ерөнхийлөгч, хоёрыг Улсын Дээд шүүх, төрийн жинхэнэ албан хаагчдаас санал болгосноор УИХ-аар сонсгол хийж, зургаан жилийн хугацаагаар томилно гэж заасан байдаг.
Энэ дагуу Улсын бүртгэлийн Ерөнхий газрын дарга Д.Дэлгэрсайхан, ЦЕГ-ын дарга Т.Сүхболд нар нэр дэвшиж байна” хэмээн хэллээ.
Нэр дэвшигчдийн талаар товч танилцуулга
Улсын Бүртгэлийн Ерөнхий Газар /УБЕГ/-ын дарга Дагвадорж овогтой ДЭЛГЭРСАЙХАН
1975 онд Улаанбаатар хотод төрсөн. Компьютерын ухааны докторант, эрхзүйч, системийн шинжээч мэргэжилтэй. Улсад 25 жил ажилласан.
Боловсрол:
- 1992-1997 онд Монгол Улсын Техникийн их сургууль, Компьютерын техник менежментийн сургууль программ зохиогч инженер мэргэжлээр компьютерын ухааны бакалаврын зэрэгтэй төгссөн.
- 1997-1999 онд мөн сургуулийн программ хангамж мэргэжлээр компьютерын ухааны магистр зэрэг хамгаалсан.
- 2008-2011 онд Шинжлэх ухааны техникийн их сургуулийн Компьютерын техник менежментийн сургуульд программ хангамж мэргэжлээр компьютерын ухааны докторантаар суралцсан.
- 2019-2022 онд Орхон их сургуульд эрхзүйчээр суралцаж төгссөн.
Ажлын туршлага:
- 1997-2004 онд Монгол Улсын Техникийн их сургууль, Компьютерын техник менежментийн сургуульд багш, ахлах багш
- 2000-2011 онд “Старсофт” компанийн үүсгэн байгуулж, төслийн удирдагчаар ажиллаж байсан.
- 2006-2012 “Старс” дээд сургуулийг үүсгэн байгуулж, захирлаар ажиллаж байсан.
- 2011-2014 онд “Нью прогресс” групп компанид мэдээлэл технологийн газрын дэд захирал
- 2014-2016 онд Эй Ти Инженеринг компанийн гүйцэтгэх захирлаар
- 2016-2020 онд Улсын бүртгэлийн ерөнхий газрын дэд дарга
- 2020-Одоог хүртэл Улсын Бүртгэлийн Ерөнхий Газрын даргаар ажиллаж байна.
Шагнал:
- Боловсролын тэргүүний ажилтан
- Мэдээлэл харилцаа холбооны тэргүүний ажилтан
- Улсын бүртгэлийн тэргүүний ажилтан
Цагдаагийн Ерөнхий Газар /ЦЕГ/-ын дарга Төмөрбаатар овогтой СҮХБОЛД
1980 онд Улаанбаатар хотод төрсөн. Эрхзүйч, эдийн засагч мэргэжилтэй. Хуульзүйн ухааны магистр
Боловсрол:
- Цагдаагийн академийг эрхзүйч, цагдаагийн байгууллагын ажилтан бакалавраар төгссөн.
- Эдийн засгийн дээд сургуулийг эдийн засагч бакалавраар төгссөн.
- Удирдлагын академийг төрийн удирдлагын менежментээр суралцаж төгссөн.
- Цагдаагийн академид хууль зүйн ухааны магистрын зэрэг хамгаалсан.
Ажлын туршлага:
- 1998-2001 онд Сонгинохайрхан дүүргийн цагдаагийн хэлтэст цагдаа
- 2005-2007 онд Хэнтийн аймгийн цагдаагийн газарт хэсгийн төлөөлөгч
- 2007- 2021 онд Мөн газартаа эдийн засгийн төлөөлөгчөөр ажилласан.
- 2013-2016 онд Эрүүгийн цагдаагийн газрын Эдийн засгийн гэмт хэрэгтэй тэмцэх тасаг хэлтэст ахлах төлөөлөгчөөр
- 2016-2017 онд Мөн хэлтэст тасгийн даргаар
- 2017 онд Цагдаагийн ерөнхий газрын мэдээлэл нэгтгэн боловсруулах газарт ахлах мэргэжилтэн
- 2017-2018 онд Эрүүгийн цагдаагийн албаны Эдийн засгийн гэмт хэрэгтэй тэмцэх тасаг хэлтэст тасгийн дарга
- 2018-2020 онд Эрүүгийн цагдаагийн албаны Эдийн засгийн гэмт хэрэгтэй тэмцэх тасаг хэлтэст мөнгө угаах гэмт хэрэгтэй тэмцэх хэлтсийн дарга
- 2020 онд Эрүүгийн цагдаагийн албаны дэд бөгөөд Эдийн засгийн гэмт хэрэгтэй тэмцэх газрын дарга
- 2020-2023 онд Эрүүгийн цагдаагийн албаны дарга
- 2023 оны есдүгээр сараас Цагдаагийн Ерөнхий Газрын даргаар ажиллаж байна.
Шагнал:
- Санхүү, банкны тэргүүний ажилтан
- Хууль зүй, дотоод хэргийн яамны цагдаагийн алдар тэмдэг
- Хууль зүйн тэргүүний ажилтан
- Цэргийн хүндэт
Х.ТҮШИГ
