Улсын дээд шүүхийн Захиргааны хэргийн танхимын нийт шүүгчийн хуралдаанаас Ардын чуулган нам үүсгэн байгуулсныг улсын бүртгэлд бүртгүүлэхээр ирүүлсэн иргэн Ш.Сайхансамбуугийн өргөдлийг буцаасан байна.
УИХ-ын гишүүн асан Ш.Сайхансамбуу намаа бүртгүүлэхээр УДШ-д өнгөрсөн арван хоёрдугаар сарын 12-нд өргөдөл хүргүүлж байсан юм.
Сануулахад, тэрбээр 2022 онд Ардын чуулган гэх нам байгуулж, бүртгүүлэх хүсэлтээ Улсын дээд шүүхэд хүргүүлсэн. Гэвч намын гишүүний тоо 801-д хүрээгүй гэх шалтгаанаар түүний намыг бүртгэхээс татгалзаж байсан юм. Үүнээс хойш тэрбээр УДШ-д дөрвөн удаа хүсэлт хүргүүлсэн. Тав дахиа хандаж буй нь энэ юм.
Гэвч улс төрийн намын бүртгэл хөтлөх журмын 3.8-д заасан шаардлагыг бүрэн хангаагүй, өмнө намыг бүртгэхээс татгалзсан нийт шүүгчийн хуралдааны тогтоол, шүүгчийн албан бичгүүдэд дурдсан зөрчлүүд арилаагүй үндэслэлээр өргөдөл, түүнд хавсаргасан баримт бичгийг буцаахаар шийдвэрлэжээ.
А.САЙХАН
