Улсын ерөнхий прокурорын газраас “Гэр бүлийн хүчирхийлэлтэй тэмцэх тухай хууль зөрчих” зөрчлийн гаралт, шийдвэрлэлт, зөрчил үйлдэгдэж буй шалтгаан нөхцөлийг 2023 оны гуравдугаар улирлын байдлаар судалжээ.
Дээрх хугацаанд улсын хэмжээнд 197,000 гаруй зөрчлийн гомдол, мэдээлэл бүртгэгдсэнээс 21,000 буюу 10.7 хувь нь гэр бүлийн хүчирхийлэлтэй холбоотой байна.
Гэр бүлийн хүчирхийлэлтэй тэмцэх тухай хууль зөрчих зөрчлийн талаарх гомдол, мэдээллийн дийлэнх буюу 81.8 хувь нь Нийслэлд, 18.2 хувь нь орон нутагт бүртгэгдсэн байна.
Үүнээс Нийслэлд Баянзүрх, Сонгинохайрхан дүүрэг, орон нутагт Сэлэнгэ, Баян-Өлгий аймагт бүртгэгдсэн гомдол, мэдээлэл хамгийн их байжээ. Хохирогчтой хамаарал бүхий байдлыг судлахад нөхөр 5,374, эхнэр 557, эцэг 409, эх 105 хүн гэр бүлийн хүчирхийлэл үйлдсэн байжээ.
Мөн зөрчилд холбогдогчдын 70 гаруй хувь нь согтууруулах ундааны зүйл хэрэглэсэн үедээ гэр бүлийн хүчирхийлэл үйлдсэн болох нь судалгаагаар тогтоогдсон байна. Түүнчлэн судалгаагаар амьдралынхаа туршид бие махбодын хүчирхийлэлд өртсөн хохирогчдын 28.6%, сэтгэл санааны хүчирхийлэлд өртсөн хохирогчдын 41.4%, эдийн засгийн хүчирхийлэлд өртсөн хохирогчдын 19.3% нь дээд боловсролтой байжээ.
