“Нүүрсний” гэх тодотголтой хэрэгт яллагдагчаар татагдсан “Эрдэнэс Тавантолгой” ХК-ийн Гүйцэтгэх захирал асан Б.Ганхуяг, УИХ-ын гишүүн асан, ХНХ-ын сайд асан Т.Аюурсайхан нарын 11 хүнд холбогдох хэргийн гэм буруугийн шүүх хурал өчигдөр (2024.01.15) Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд эхэлсэн.
Хуралдааны үеэр яллагдагч О.Данзанлувсантүдэвийн өмгөөлөгч Л.Очбаяр шүүх хурлыг хаалттай хуралдуулах хүсэлт гаргасан юм. Энэ дагуу шүүх бүрэлдэхүүн хэлэлцэж, хуралдааныг хаалттай хэлбэрээр үргэлжлүүлж буй.
Өчигдөр шүүх хурал 22:00 цагт завсарлажээ. Улмаар өнөөдөр 10:00 цагаас үргэлжлэх аж.
Сануулахад,
- Т.Аюурсайханыг Авлигын эсрэг хуулийн 4 дүгээр зүйлийн 4.1.1-д хамаарах нийтийн албан тушаалтнаар ажиллаж байхдаа эрх мэдэл, албан тушаалын байдлаа урвуулан ашиглаж, өөртөө болон бусдад давуу байдал бий болгосон байж болзошгүй, мөн үндэслэлгүйгээр хөрөнгөжсөн, мөнгө угаасан гэх хэргээр,
- Б.Ганхуягийг Эрүүгийн хуулийн тусгай ангийн 22.4 дүгээр зүйлийн 4 /Хахууль авах/, 22.10 дугаар зүйлийн 1 /Үндэслэлгүйгээр хөрөнгөжих/, 18.6 дугаар зүйлийн 2 дахь хэсгийн 2.2, 2.3 /Мөнгө угаах/ дахь заалтад заасан гэмт хэрэгт холбогдуулан шүүж буй билээ.
Х.ТҮШИГ
