ХАМАС-ын удирддаг Эрүүл мэндийн яамны мэдээлснээр, Израилийн довтолгоо эхэлснээс хойш Газын зурваст 25 мянга гаруй хүн амиа алдсан байна. Сүүлийн 24 цагийн дотор 178 хүн амиа алдсан гэж мэдээлсэн нь өнөөг хүртэл дайнд хамгийн их хохирол учруулсан өдрүүдийн нэг болжээ.
Тэмцэл ийнхүү үргэлжилсээр байгаа ч Израилийн Ерөнхий сайд Биньямин Нетаньяху Палестин улс байгуулахаас дахин татгалзсан байна.
ХАМАС-ын дайчид өнгөрсөн оны аравдугаар сарын 7-нд Израилийн өмнөд хэсэгт 1300 хүний аминд хүрч, 240 гаруй хүнийг барьцаалсан халдлага үйлдсэн. Үүний дараа Израиль давшилтаа эхлүүлсэн билээ.
ХАМАС өнгөрсөн Ням гарагт халдлагын тухай мэдээлэхдээ, Палестины газар нутгийг Израилийн эзлэн түрэмгийлж, түүний эсрэг хийсэн “зайлшгүй шаардлагатай алхам” бөгөөд Палестины хоригдлуудыг суллах арга зам гэж тодорхойлсон байна.
Израилийн агаарын болон хуурай замын ажиллагаа яг одоо Газын өмнөд хэсэг рүү чиглэж буй бөгөөд цэргийнхэн ХАМАС бүлэглэлийн дээд командлагчид Хан Юнис хотод, эсвэл түүний доор нуугдаж байгаа гэдэгт итгэлтэй байгаа аж.
Израилийн Батлан хамгаалах хүчин (IDF) тус хотоос 830 метр (2,700 фут) урттай өөр нэг хонгил илрүүлсэн гэж мэдэгдэв.
IDF-ийн бичлэгээс харахад, тус хонгор дотор гудас, хөнжил гэх мэт харагдаж байсан бөгөөд барьцааны 20 орчим хүн, түүний дотор олон газраас ирсэн хүүхдүүд байсан гэж Израилийн тал үзэж байгаа аж.
Эх сурвалж: BBC
Д.ТУЯА
