Украины цэргийн тагнуулын албаны ажилтан “ОХУ-ын цэргийн тээврийн онгоц осолдсон газраас зөвхөн таван цогцос олдсоныг ойролцоох шарил хадгалах газарт хүргэсэн гэх тагнуулын мэдээлэлтэй байна” гэж CNN-д ярьжээ.
Украины зүүн хэсэгт оршдог Белгород хотод өнгөрсөн Лхагва гарагт “Илюшин Ил-76” онгоц хэрхэн сүйрсэн талаар Москва, Киев хоёр өөр мэдээлэл өгсөн. Москва уг онгоцоор Украины олзлогдогсдыг тээвэрлэж явсан гэж мэдэгдсэн бол Киев Украинд цаашид цохилт өгөхөд ашиглах Оросын пуужингуудыг тээвэрлэж явсан гэж мэдэгдсэн.
Гэвч Москвагийн мэдэгдсэнээр ОХУ-ын Белгород мужийн Яблоново тосгонд Лхагва гарагийн өглөө осолдсон “Ил-76” онгоцоор Украины олзлогдогчдыг тээвэрлэж яваагүй байж магадгүй гэсэн таамаглал нэмэгдэж буйг сүүлийн үеийн тайлбарууд харуулж байгаа аж.
Украины Батлан хамгаалахын тагнуул (DI)-ын хэвлэлийн төлөөлөгч Андрей Юсов “CNN” агентлагт мэдээлэхдээ “Шарил хадгалах газарт авчирсан цогцосны тоо онгоцны багийн гишүүдийн тоотой тэнцэж байна. Өөр цогцос олдоогүй” гэж хэлжээ.
Москва “Осолдсон онгоцоор онгоцны багийн зургаан гишүүн, хамгаалалтын гурван цэрэг, Украины 65 цэргийн албан хаагч, нийт 74 хүн зорчиж явсан бөгөөд бүгд амиа алдсан” гэж мэдэгдсэн. Оросын бүс нутгийн захирагч зургаан хүний бүрэлдэхүүнтэй онгоцны багийнхны нэрсийн жагсаалтыг ил болгожээ.
ОХУ-ын төрийн мэдээллийн хэрэгслээр цацсан анхны дүрс бичлэгээс хэд хэдэн цогцос харагдаж байсан ч хэдэн арван хүний амь үрэгдсэнийг илтгэх ямар ч зураг байгаагүй аж. Оросын Мөрдөн байцаах хороо ослын газраас хийсэн хоёр дахь дүрс бичлэгээ Пүрэв гарагт нийтэлжээ. Дээрх хоёр дүрс бичлэг “Umbra Space”-ийн CNN-д зориулан авсан синтетик диафрагмын радар (SAR)-ын зургийн байршилтай таарсан байна.
Эх сурвалж: CNN
Д.ТУЯА
