“Нүүрсний” гэх тодотголтой хэрэгт яллагдагчаар татагдсан “Эрдэнэс Тавантолгой” ХК-ийн Гүйцэтгэх захирал асан Б.Ганхуяг, УИХ-ын гишүүн асан, ХНХ-ын сайд асан Т.Аюурсайхан нарын 11 хүнд холбогдох хэргийн гэм буруугийн шүүх хурал өнгөрөгч нэгдүгээр сарын 15-нд Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд эхэлсэн билээ.
Уг шүүх хурал 10 хоног үргэлжилсний эцэст завсарлаж, шүүх бүрэлдэхүүн зөвлөлдөж эхэлжээ.
Энэ талаар Сүхбаатар дүүргийн шүүхээс тодруулахад “Өнгөрсөн Баасан гарагт гэм буруугийн хурал завсарласан. Шүүх бүрэлдэхүүн зөвлөлдөж байна. Хэр удахыг мэдэхгүй” гэв.
Шүүх бүрэлдэхүүний гаргасан шийдвэрийн талаар бид эргэн мэдээлэх болно.
Сануулахад,
- Т.Аюурсайханыг Авлигын эсрэг хуулийн 4 дүгээр зүйлийн 4.1.1-д хамаарах нийтийн албан тушаалтнаар ажиллаж байхдаа эрх мэдэл, албан тушаалын байдлаа урвуулан ашиглаж, өөртөө болон бусдад давуу байдал бий болгосон байж болзошгүй, мөн үндэслэлгүйгээр хөрөнгөжсөн, мөнгө угаасан гэх хэргээр,
- Б.Ганхуягийг Эрүүгийн хуулийн тусгай ангийн 22.4 дүгээр зүйлийн 4 /Хахууль авах/, 22.10 дугаар зүйлийн 1 /Үндэслэлгүйгээр хөрөнгөжих/, 18.6 дугаар зүйлийн 2 дахь хэсгийн 2.2, 2.3 /Мөнгө угаах/ дахь заалтад заасан гэмт хэрэгт холбогдуулан шүүж буй билээ.
Х.ТҮШИГ
