Иргэн Нямжавын Номун-Эрдэнэ D-Parliament нийтийн өргөдлийн цахим хуудаст “Гадаадын иргэнд газрыг 100 жилээр ашиглуулж, эзэмшүүлэх хуулийн заалтыг цуцлах” өргөдлийг байршуулсан. Уг өргөдлийг дэмжсэн хүний тоо 100 мянгыг давжээ.
Үүнтэй холбогдуулан УИХ-ын дарга Г.Занданшатар “Иргэд, малчидтай уулзаж явахад газрыг гаднынханд 100 жилээр эзэмшүүлэх, ашиглуулах хуульд санаа зовж, хэлэлцэж байна. Үүнтэй холбоотойгоор иргэн Нямжавын Номун-Эрдэнэ энэ оны нэгдүгээр сарын 22-нд гадаадын иргэнд газрыг 100 жилээр эзэмшүүлэх, ашиглуулах тухай хуулийн төслийг хүчингүй болгох, цуцлахыг санаачилж, D-Parliament-д өргөдөл байршуулсан. Энэ санаачилгыг өнөөдрийн байдлаар 100 мянга 117 иргэн дэмжсэн байна.
УИХ-ын чуулганы хуралдааны дэгийн тухай хуульд заасны дагуу иргэд хууль санаачилж, түүнийг нь 100 мянгаас дээш иргэн дэмжсэн бол УИХ-ын тамгын газар хуулийн төслийг боловсруулж, хэлэлцүүлэгт бэлтгэх ёстой. Улмаар УИХ-ын байнгын хороод, чуулганаар хэлэлцэх учиртай. Иймээс бид цахимаар хуралдаж, хуулийн төслийг боловсруулж, Засгийн газраас санал авахаар хүргүүлэхээр шийдвэрлэлээ. Хаврын чуулганаар энэ хуулийн төслийг хэлэлцэнэ” хэмээн хэллээ.
Х.ТҮШИГ
