Монгол Улсын Засгийн газраас хэрэгжүүлж буй “Авлигатай тэмцэх таван “Ш” ажиллагаа”-ны “Шувуу” ажиллагааны хүрээнд бусдыг залилах гэмт хэрэг үйлдэж, шалгагдаж байх хугацаандаа гадаад улсад оргон зайлсан Г гэгчийг Интерполын “Хөх булант” зар мэдээгээр олон улсын хэмжээнд эрэн сурвалжилж, олж тогтоожээ.
Дээрх этгээдийг Бүгд Найрамдах Турк Улсаас холбогдох хууль, тогтоомжийн хүрээнд энэ оны хоёрдугаар сарын 2-ны өдөр Монгол Улсад албадан авчирч, мөрдөн шалгах ажиллагааг үргэлжлүүлж буй аж.
“Авлигатай тэмцэх таван “Ш” ажиллагаа”-ны “Шувуу” ажиллагааны хүрээнд интерполоор эрэн сурвалжлагдаж байсан, Хүнс, хөдөө аж ахуй хөнгөн үйлдвэрийн сайдаар ажиллаж байсан Т.Бадамжунайг өнгөрсөн 2023 оны дөрөвдүгээр сарын 5-нд Филиппин улсаас баривчлан авчирч, тухайн сарын 7-ноос эхлэн цагдан хорьсон. Улмаар авлигын хэрэгт холбогдуулан шалгаж, яллагдагчаар татсан билээ.
Х.ТҮШИГ
