Авлигатай тэмцэх газраас Нийтийн мэдээллийн тухай хуульд заасан мэдээлэл нээлттэй, ил тод, үнэн зөв байх, бодитой мэдээллээр хангах үндсэн зарчмын дагуу авлигын гэмт хэргийн мөрдөн шалгах ажиллагааны талаарх мэдээллийг Монгол Улсын Үндсэн хуулийн 16 дугаар зүйлийн 14 дэх заалт, Эрүүгийн хэрэг хянан шийдвэрлэх тухай хуулийн 29.3 дугаар зүйлийн 5 дахь хэсэгт заасныг чанд баримтлан товч байдлаар олон нийтэд мэдээлдэг.
Тус газрын Мөрдөн шалгах хэлтэс 2024 оны хоёрдугаар сарын 19-нөөс 25-ны өдрүүдэд гэмт хэргийн шинжтэй 94 гомдол, мэдээллийг шалгажээ. Үүнээс 18 гомдол, мэдээлэлд хэрэг бүртгэлтийн хэрэг нээж, 15 гомдол, мэдээлэлд хэрэг бүртгэлтийн хэрэг нээхээс татгалзжээ.
Нэг гомдол мэдээллийг харъяаллын дагуу шилжүүлэх саналтайгаар прокурорт шилжүүлсэн бөгөөд одоогоор 60 гомдол, мэдээллийг хянан шалгаж байгаа аж.
Түүнчлэн эрүүгийн 868 хэрэгт мөрдөн байцаалтын ажиллагаа явуулснаас өнгөрсөн долоо хоногт дөрвөн хэргийг шүүхэд шилжүүлэх, есөн хэргийг хаах саналтай прокурорт хүргүүлжээ.
Мөрдөн шалгах ажиллагаанд өнөөдрийн байдлаар 855 хэрэг шалгагдаж буй юм байна. Хэрэг бүртгэлтийн хоёр хэрэгт нийт долоон объектод нэгжлэгийн ажиллагаа явуулжээ.
Шүүхэд шилжүүлэх саналтайгаар прокурорын байгууллагад хүргүүлсэн хэргүүдийг дурдвал:
-“С” нь Экологийн цагдаагийн албаны албан тушаалтнаар ажиллаж байхдаа бусдаас хахууль авсан гэх;
-Улс төрд нөлөө бүхий этгээд болох Улсын Их Хурлын гишүүн Н.Н бусдад хууль бус давуу байдал бий болгосон, үндэслэлгүй хөрөнгөжсөн гэх;
-Төв аймгийн Сэргэлэн сумын удирдах албан тушаалтан “Т”, “С” нар нь бусдад хууль бус давуу байдал бий болгосон гэх;
-Увс аймгийн Засаг даргын Тамгын газрын удирдах албан тушаалтан “Ч”, “О”, “Б” нар нь гэмт хэрэг үйлдэхийг санаачилсан, үйлдлээрээ санаатай нэгдэж, хамтран оролцож, албан үүрэг, бүрэн эрх, албан тушаалын байдлаа урвуулан ашиглаж, бусдад давуу байдал бий болгосон гэх зэрэг хэргүүд байгаа ажээ.
Э.ЭГШИГЛЭН
