Зуны сар гарч, өдөр хоногууд сунайсаар. Бүтэн өдрийн турш эрч хүчтэй явахад хүндрэлтэй байдалтай хэн хүнгүй л нүүр тулж яваа. Өглөө эрч хүчтэй ажилдаа ирсэн ч ширээний ард эрхгүй нозоорч нойр хүрэх тохиолдол элбэг. Тэр тусмаа оффисын ажилтан, дамжлага үйлчилгээний ажилтнуудад нойрмоглох асуудал тулгарах нь их.
Ажлын цагаар нойр хүрч, нозоорох нь олон шалтгаантай байж болно. Энэ үед нойрыг сэргээх, анхаарлаа төвлөрүүлэхэд туслах зарим аргыг нэрлэж байна.
Юуны өмнө нозоорч нойр хүрнэ гэдэг биеийн энерги, эрч хүч буурсантай холбоотой. Мөн чанаргүй нойр болон агааргүйдэл, стресс бухимдал, өвчлөл зэргээс хамаарч болдог. Тиймээс нэгдүгээрт, бие эрүүл байснаар л эрч хүчээр дүүрэн байна гэдгийг санах хэрэгтэй.
Яг одоо сандлаасаа босоод, дасгал хийгээд үз
Богино хугацаагаар алхах, дасгал хийх нь цусны эргэлтийг сайжруулж, энерги нэмдэг. Ажлын байран дээрээ тавхан минутыг өөртөө зарцуулан сунгалт, дасгал хийхэд таны бие хэвийн хэмжээнд эргэн очдог байна.
Шингэн зүйл уух: Ус сайн уух нь биеийг сэргээж, тархины үйл ажиллагааг сайжруулна. Хүн өдөрт 2-5 литр шингэн уувал зохино. Гэхдээ нэг дор их хэмжээгээр бус, бага багаар шимж уухыг зөвлөдөг.
Агаар амьсгалах: Гадаа гарах, цэвэр агаарт амьсгалах нь тархины хүчилтөрөгчийн хангамжийг нэмэгдүүлж, анхаарал төвлөрлийг сайжруулна. Хэдэн минутын турш гүнзгий амьсгалах нь стрессийг бууруулж, анхаарлаа төвлөрүүлэхэд тусална. Нэг их өөрийгөө хүчлэж ажиллахад үр дүн гардаг биш сэтгэл ханамжтай ажиллахад л жинхэнэ үр дүн гардаг.
Цай, кофе уух: Зохистой хэмжээгээр кофе, цай уух нь нойргүй болгоход тустай. Гэхдээ хэтрүүлж хэрэглэхээс зайлсхийх хэрэгтэй.
Хөнгөн зууш идэх: Жимс, самар зэрэг хөнгөн, эрүүл хүнс идэх нь энерги нэмнэ.
Өөрчлөлт: Хэдхэн минутын турш өөр ажилд шилжих нь шинэ сорилт өгч, тархины үйл ажиллагааг сэргээхэд тусалдаг. Боломжтой бол та яг одоо хийж байгаа зүйлээсээ түр зуурын завсарлага авч өөр ямар нэг зүйлийг хийж эхлэх хэрэгтэй. Жишээ нь ажлынхаа дундуур ширээгээ цэгцлэж, ажлынхаа цэцгийг услаж ч болно.
Богино хугацааны нойр авах: Боломжтой бол богино хугацаагаар, 10-20 минут унтаж амрах нь зүйтэй. 20 минут нүдний хороо гаргахад ажлын бүтээмж болон сэтгэл санааны байдал эрс сайжирдаг бол 30 минутын турш дугхийхэд “нойрны шарталт”-д орох буюу огтхон ч сэргэсэн мэдрэмж авдаггүй. Тиймээс та сэргэг мэдрэмж авахаар төлөвлөж байгаа бол 10-20 минут унтахад л болно.
Чанартай нойр: Өдрийн цагаар 90 минутын турш дугхийх нь шөнө 8 цаг унтсантай ижил үр дүн өгдөг гэдгийг НАСА-гаас ч баталсан байдаг. Энэ нь нойрны цикл ерөнхийдөө 90 минут үргэлжилдэг тул та хангалттай сайн амарч чаддаг гэсэн үг.
Эдгээр аргуудыг та тогтмол хэрэгжүүлж хэвшсэнээр ажлын бүтээмжээ бүрэн нэмэх боломжтой.
А.БАЯР
