Бороотой өдрийн цонхоор хотыг ажаад, та бид гэгэлзсэн мэдрэмж авдаг билээ. Харин энэ үед цээжнээ орж ирсэн мөрт болоод, дууны бадгийг амандаа аялсхийгээд л өнгөрдөг. Тэр бүр яруу найргийн ном дэлгээд, мөр шүлэг унших нь ховор ч сэтгэлд ойрхон байдгийг нуух юун.
Энэ удаад яруу найрагчдын дууны мөртөд зориулж бичсэн шүлгүүдийг хүргэж байна.
-
Сэтгүүлч, яруу найрагч А.Азсайхан “ЖИ МИНОР”
Ballad No.1
Уй гунигийн дууч минь
Уйтгар шаналан руу түлхэгч
Чи минь… сайхан чи минь
Сайхан бүхнээс аврагч минь
Чамайгаа л хүлээж байсан шиг…
Ballad No.2
Арваннэгдүгээр сарын будрах цасанд өлгөөтэй,
Гэгээрэлд хөтлөх далавчтай,
Мөрөөдлөө орхиж, үлдэнэ гэдэг.
Ийм нандин жигүүрээ, Ирээдүйг орхиж, үлдээнэ гэдэг.
Өнгөрсөндөө хуучирсан чи
Өөр дотор минь уусчих шиг л…
Ballad No.3
Аз жаргалаас аврагч
Аз жаргалаа ч авч ирэх чи
Чимээ үгүй дотоодоос ч
Чимээ өгөхийг хичээх үү
Ballad No.4
Ирээдүй гэдэг өнгөрсөнтэй ижил
Инээд шиг замхарч, инээх хүсэл ч замхарна.
Өөрт минь үлдэх бүхэн замхарч дууссаны дараа л
Инээх хүсэл төрөх шиг,
Хүрч чадахгүй холоос ч хүрэх хүслээ тээж явах…
Хагацал гэдэг хэзээд аз жаргалтай…
2. Яруу найрагч Б.Батзаяа “CREEP”
Бөмбөрийн сулхан хэмнэл дээр
Жонни Гринвүд хөгжимдөнө.
Би . чамайг хараад яг ингэж бодсон
– Том Йорк дуулна.
Бөгс эргэх зайгүй энэ давчуухан өрөөнд бөмбөг тэсрэх шиг гэнэт цахилгаан гитар…
Би бол хачин амьтан.
Гэвч хүлээ буцах замаа чи минь олохгүй байж мэднэ.
Би ийм л гажиг хүн, тиймээс гэрлээ унтраа!
Бид хоёрын тухай Радиохед дуулж байна.
…But I’m creep, I’m a weirdo* What the hell am i doin here?
I don’t belong here…
Oh,oh She’s running out again…
3. Яруу найрагч Г.Сүхзориг “Амиа хорлогсдын кафе”
Нэг аяга өтгөн кофе Сүүгүй байвал / чихэргүй / Зүгээр.
Хоёр ширхэг тамхи
Нэг сум, макаров
Metallica – Nothing else matters
Чангахан шиг тавиарай.
Гэрээслэл бичих
Цаас, үзэг хэрэггүй.
– Сүүлчийн үг үү?
Бурхантай очиж заргалдах минь…
Аан тийм
Чүдэнз байвал өгдөө….
4. Яруу найрагч С.Батзориг “Нэргүй шүлэг”
Харангын “Зүүд”-ийг сонсож суулаа
Хамгийн үнэн амлалт хэзээ ч биелдэггүй тухай
Хаврыг хүлээх нь намар хийж болох хамгийн утгатай үйл болдог тухай
Хайр сэтгэл ямагт хагацаж салахын заяанд зурагдсан тухай
Хагацлыг хүсэхгүй тусмаа чиний зүрх хагацалд урагдсан тухай
Мэдэж авлаа би мэдэрч суулаа би
Никитоны “Хожимдсон гэмшил”-ийг сонсож суулаа
Нэгэнт өнгөрсөн цаг хугацаа л үнэ цэнээ олдог тухай
Нил ягаан өнгө чиний өнгө тэгээд жам ёсны өнгө болох тухай
Чивэлт хайр дурлал аз жаргалыг дагуулдаггүй тухай
Чийг татсан ийм өдрүүд л нар гийхийн шалтгаан болдог тухай
Мэдэж авлаа би мэдэрч суулаа би
A sound-ын “Forever”-г сонсож суулаа
Эмэгтэйлэг эрэгтэйчүүд жинхэнэ эр хүн байдаг тухай
Ээнэгшин байсан минь эргэж ирэхгүй одсон тухай
Эргэж ирэхгүй одох нь л ихийн их хайр байдаг тухай
Ихийн их хайр гэдэг нь эрэг эргээ харах мэт
Эгнэгт нийлшгүй ч эцэж цуцалгүй нэгнээ ширтсээр л байдаг тухай
Мэдэж авлаа би мэдэрч суулаа би…
5. Яруу найрагч Я.Баяраа “Нэргүй шүлэг”
Энэ амьдрал амглаанг эрэгсэдэд зориулагдаагүй