Монгол Улсын хэмжээнд анх удаа орон нутгийн төсвийн хөрөнгө оруулалтаар Сүхбаатар дүүрэг дэлхийн жишигт нийцсэн стандарт бүхий, 200 ортой Сэлбэ нэгдсэн эмнэлгийг барьж, Улсын комисст хүлээлгэн өглөө.
Нэгдсэн эмнэлэг барих төслийг эхлүүлэхийн тулд 80 гаруй айлын газрыг чөлөөлүүлжээ. Энэхүү эмнэлэг Сэлбэ дэд төвийг түшиглэн, Сүхбаатар дүүргийн 13 дугаар хорооны нутаг дэвсгэрт 2.2 га талбайд байршиж байна.
Барилгын зохион байгуулалтын хувьд А, Б блок гэсэн хоёр үндсэн хэсэг, техникийн туслах байраас бүрдсэн нийт 12500 м2 барилгын талбайтай. Эмнэлгийн барилгын ажлыг 2021 оны наймдугаар сард эхлүүлсэн бөгөөд өнгөрсөн хоёр жил гаруйн хугацаанд үргэлжилсэн юм.
Орчин үеийн эрүүл мэндийн салбарын стандарт бүхий дэлхийн жишигт нийцсэн энэхүү эмнэлэг нь үндсэн долоон мэргэжлээр буюу хүүхэд, эмэгтэйчүүд, чих, хамар, хоолой, дотор, мэдрэл гэсэн чиглэлээр Сүхбаатар дүүргийн 143 мянган иргэнд эмнэлгийн анхан шатны тусламж, үйлчилгээ үзүүлэх юм.
Нийт хэвтүүлэн эмчлэх 200 ортойгоор үйл ажиллагаа явуулах ба үүнээс хүүхдийн тусламж үйлчилгээнд 40 ор байхаас 4 нь хүүхдийн эрчимт эмчилгээний, насанд хүрэгчдийн 160 орноос 6 нь хүлээн авах яаралтай тусламжийн ажиглалт тусгаарлах, 20 нь насанд хүрэгчдийн эрчимт эмчилгээнийх байхаар төлөвлөгджээ.
Мөн мэс заслын дөрвөн вакумжсан өрөөтэйгөөс гадна сувилагч нар сорьц, шинжилгээний дээжээ барьж гүйдгийг халж, сорьц, шинжилгээний дээжүүдийг зориулалтын лифтээр зөөх юм.
Бактери үрждэггүй тааз, хулдаас, рентген туяа нэвтэрдэггүй шил
Эмнэлгийн барилга газар хөдлөлтийн 8 баллд тэсвэртэй төмөр бетонон карказтайгаас гадна эмнэлэг өөрөө маш нарийн стандарттай тусгай объект тул мэс засал, лабаротори, сэхээний тасаг зэргийн барилгын материал нь нян, бактери үрждэггүй эмнэлгийн зориулалтын тааз, хулдаас, үнэргүй эмульс, будаг, рентгений өрөөнд гэхэд туяа нэвтрүүлдэггүй шил зэргийг сонгожээ. Өөрөөр хэлбэл, орчин үед мөрдөгдөж байгаа стандартын дагуу барьж, ашиглалтад оруулсан байна.
Мөн эмнэлэг хүчилтөрөгчийн шугамтай. КОВИД-19 цар тахлын үеэр хүчилтөрөгч гээд баллон авчраад залгадаг байсан бол энэ удаад хүчилтөрөгчийг шууд хананаасаа авна.
Хүчилтөрөгч үйлдвэрлэх тусдаа бие даасан барилгатай гэсэн үг. Газар доогуур шугам нь яваад, барилгын ханаар дамжин, бүх өрөөнд хүчилтөрөгч зэс хоолойгоор хүрнэ. Мөн хамгийн сүүлийн үеийн утаа мэдрэгч системтэй. Галын үед автоматаар ус шүршинэ.
Өрөө болгонд өвчтөн бүрийн орны толгойд, тэр ч байтугай бие засах газар, шүршүүр болгонд гэнэт бие муудахад болон өөрөө бие даан босож, сууж чадахгүй хүмүүст зориулаад сувилагч дууддаг хонх байрлуулжээ.
Иж бүрэн лаборатори, CTR, CРІ аппарат зэрэг тоног төхөөрөмж
Эмнэлгийн барилга анх баригдаж эхэлсэн цагаас л эмнэлгийн тусгай тоног төхөөрөмжийг суурилуулжээ. Сүхбаатар дүүрэг Сэлбэ нэгдсэн эмнэлэгт зориулаад нийт 184 нэр төрлийн 2672 ширхэг тоног төхөөрөмж, компьютер, техник, эм эмнэлгийн багаж хэрэгслийг дүүргийн тесвийн санхүүжилтээр худалдан авч, бэлэн болгосон бөгөөд иж бүрэн лаборатори, CTR, СРІ аппарат зэрэг тоног төхөөрөмжийг суурилуулсан байна.
Зарим эмнэлгийн эмч нар цонхгүй, харанхуй өрөөнд сууж байгаа нь анзаарагддаг. Сэлбэ эмнэлэгт эмч нарын өрөө цонхтой буюу байгалийн гэрэлтэй байх нь. Дандаа хүнд өвчтэй хүмүүстэй харилцдаг хүмүүст стресстэж, ядрахгүй байх нөхцөлийг бүрдүүлэхийг хичээж, орчин үеийн, дэлхийн жишигт нийцсэн стандарт барьжээ. Энэ мэтээр таван давхар эмнэлэг гадна талдаа 100 машины зогсоол, амрах хэсэг гээд, иж бүрэн тохижилттой томоохон бүтээн байгуулалт болон сүндэрлэж байна.
Монгол Улсын хэмжээнд орон нутгийн төсвөөр барьсан анхны эмнэлэг нь энэхүү Сүхбаатар дүүргийн Нэгдсэн эмнэлэг болж, эрүүл мэндийн салбарт томоохон шинэчлэлт хийж, түүхэн бүтээн байгуулалт болж байна.
Эмнэлгийн тусламж, үйлчилгээ
Сүхбаатар дүүргийн хүн амын дунд зонхилон тохиолддог буюу тэргүүлж буй өвчлөлийг бууруулах бодлогыг үндэслэн, эмнэлгийн тусламж үйлчилгээ зохион байгуулжээ.
Сэлбэ нэгдсэн эмнэлэг 3000-3400 хүнд мэс заслын тусламж үзүүлж, амбулаторийн төрөлжсөн мэргэжлийн 21 кабинет, оношилгооны 8 кабинет, нэгдсэн лабораторийн тусламж үйлчилгээг хоногт дундажаар 950-1000 орчим жилд 267000 орчим иргэнд тусламж үйлчилгээ үзүүлэх хүчин чадалтай аж.
Дүүргийн алслагдсан хороодын оршин суугч иргэд эмнэлгийн тусламж үйлчилгээ авахад цаг хугацаа их шаардагдах, хүлээгдэл чирэгдэл нилээдгүй үүсдэг байсан. Сэлбэ эмнэлэг үйл ажиллагаагаа явуулж эхэлснээр хэрэгцээ шаардлага хангасан, чанартай, хүртээмжтэй тусламж үйлчилгээ авахад үүсдэг хүндрэлүүд буурах нь.
Дүүргийн хүн амд үзүүлэх эрүүл мэндийн тусламж үйлчилгээг төрийн бодлого чиглэлд нийцүүлэн, олон улсын оношилгоо эмчилгээний стандарт, эмнэлзүйн удирдамжийн дагуу шинэ дэвшилтэт техник технологи ашиглан, эмнэлгийн зориулалтын, таатай орчинд үйлчлүүлэгчийн сэтгэл ханамжид нийцсэн, чанартай үзүүлдэг болно.
Үзлэг, оношлогооны хүртээмж….
Амбулаториор хийх боломжтой дурангийн мэс засал, мэс ажилбар, эдийн шинжилгээ авах зэрэг оношилгоо, эмчилгээг шинээр нэвтрүүлж, тусламж үйлчилгээ авч буй өвчтөн, үйлчлүүлэгчдэд хүлээгдэл чирэгдэлгүй, үр дүнтэй, эдийн засгийн дарамтыг бууруулж, эмнэлгийн тусламж үйлчилгээний чанар хүртээмжийг сайжруулах боломж бүрдэж байна.
Нийгмийн эрүүл мэндийн тусламж үйлчилгээг өргөжүүлэх үүднээс урьдчилан сэргийлэх ажлыг тодорхой төлөвлөн зохион байгуулж, хүн амд эрт илрүүлэг, эрүүл мэндийн урьдчилан сэргийлэх үзлэг хийх, нэн ялангуяа харъяалах нутаг дэвсгэрийн сургууль, цэцэрлэг, байгууллагын суралцагч, ажиллагсдыг бүрэн хамруулж шаардлагатай тохиолдолд холбогдох тусламж үйлчилгээ үзүүлэх, эрүүл мэндийн боловсрол олгох сургалт зохион байгуулж, мэдээ мэдээллээр хангах ажлууд мөн төлөвлөгджээ.
А.БАЯР
