БНХАУ-аас Замын-Үүдэд суугаа Ерөнхий консул Кэ Юушэн энэ сарын 23-ны өдөр Замын-Үүдэд томилогдон иржээ. Түүнийг Замын-Үүд сумын Засаг дарга Б.Анхбаяр Замын-Үүд боомт дээр угтан авсан байна.
Кэ Юушэн Хятад улсын элэгсэг дотно, үнэнч шударга, үр өгөөжтэй, хүртээмжтэй байх гадаад харилцааны үзэл баримтлал болон хөршүүдтэйгээ найрсгаар нөхөрлөх, түншлэх зарчмын дагуу идэвхтэй ажиллаж, консулын тойргийн Хятад Монголын найрамдлын үйлсийг ахиулан, хоёр талын ажил хэрэгч хамтын ажиллагааг эрчимжүүлж, хоёр улс болон хоёр улсын ард иргэдийн сайн сайхны төлөө хичээнгүйлэн ажиллахаа илэрхийлжээ.
Кэ Юушэн Ерөнхий консул Замын-Үүд боомтын бүтээн байгуулалт болон боомтын үйл ажиллагаатай танилцаж, хоёр талын иргэд болон ачаа тээврийн хөдөлгөөнийг ахиулах талаар Монголын талтай санал солилцсон байна.
Ерөнхий консул Кэ Юушэн зургаадугаар сарын 24-ний өдөр Улаанбаатар хотноо Монгол Улсын Гадаад харилцааны яамны Төрийн нарийн бичгийн дарга Анхбаярт бараалхав. Ерөнхий консул Кэ Юушэн консулын патентаа Монголын талд өргөн барьжээ. Төрийн нарийн бичгийн дарга А.Анхбаяр Монголын талыг төлөөлөн Ерөнхий консул Кэ Юушэнд экзекватур олгосон байна.
Талууд Хятад, Монголын иж бүрэн стратегийн түншлэлийн харилцааг ахиулах, Хятад, Монголын хувь заяаны хамтын нийгэмлэгийг хамтаар байгуулах, консулын тойргийн аймгуудын Хятад улстай хөгжүүлэх ажил хэрэгч хамтын ажиллагааг гүнзгийрүүлэх, Хятадын хөрөнгө оруулалттай аж ахуйн нэгжүүд болон Хятад иргэдийн хууль ёсны эрх ашгийг хамгаалах талаар санал солилцжээ.
