Орос Украины дайн өнөөдөр (2024.06.26) 852 дахь өдрөө үргэлжилж байна. “Al Jazeera” мэдээлэхдээ, ОХУ-ын өмнөд хэсгийн Белгород мужид Украины нисгэгчгүй онгоц олон удаа халдлага үйлдэж, нэг эмэгтэй амиа алдаж, дөрвөн хүн шархдаж, олон арван барилга байгууламж эвдэрч сүйдсэн гэж Украинтай хил залгаа мужийн захирагч Вячеслав Гладков мэдэгдэв гэжээ.
Украины зүүн хэсгийн Донецк мужийн амбан захирагч Вадим Филашкин ОХУ-ын цэргүүд урагш давшсаар байгаа тул фронтын шугамд буй хэд хэдэн хот, тосгодоос хүүхдүүд болон тэдний эцэг эх, асран хамгаалагчдыг нүүлгэн шилжүүлэхийг тушаасан байна. Сүүлийн хэдэн долоо хоногийн турш Оросын бөмбөгдөлт эрчимжиж байгаатай холбогдуулан тэрбээр энгийн иргэдэд тус бүс нутгийг орхин явахыг уриалжээ.
Вашингтонд төвтэй Дайны судалгааны хүрээлэнгээс мэдээлснээр, барууны орнуудын зэвсгийн нийлүүлэлт удааширч, тэдгээрийг фронтын шугамд ирэхээс өмнө Оросын зэвсэгт хүчин “тактикийн болон үйл ажиллагааны хувьд чухал ашиг олох”-ыг эрмэлзэж байгаа аж.
Украины талаас ОХУ-ын Воронеж мужийн Ольховацкий дүүрэгт, Украинтай хиллэдэг хилээс 50 км-ийн зайд байрлах зэвсгийн агуулахад цохилт өгчээ. Воронежийн захирагч Александр Гусев цохилтын улмаас гал түймэр гарсан ч хүний амь эрсдээгүй талаар мэдээлсэн байна.
Олон улсын эрүүгийн шүүх ОХУ-ын Батлан хамгаалахын сайд асан Сергей Шойгу, зэвсэгт хүчний командлагч, генерал Валерий Герасимов нарыг Украины эрчим хүчний дэд бүтцэд халдсан хэрэгт буруутган, баривчлах тушаал гаргажээ. Европын Хүний эрхийн шүүх Орос улсыг 2014 онд эзлэн түрэмгийлсэн Крымийн хойгт хүний эрх зөрчсөн гэм буруутай гэж үзсэн байна.
Орос, Украин тус бүр 90 дайны олзлогдогчийг харилцан буцааж өгсөн бөгөөд Арабын Нэгдсэн Эмират улс солилцоонд зуучлагчийн үүрэг гүйцэтгэжээ. Украины Агаарын цэргийн хүчний командлагч “Киев энэ онд Оросын талаас хөөргөсөн 2277 нисгэгчгүй онгоцноос 1953-ыг нь устгасан” гэж хэлсэн байна.
“Reuters” агентлаг Оросын эсрэг тулалдаж буй Украины дайны фронтын шугамын дүр зургийг хальсанд буулгажээ.
Эх сурвалж: REUTERS, AL JAZEERA
Д.ТУЯА
