Цагаан ордны Үндэсний аюулгүй байдлын зөвлөл (ҮАБЗ)-ийн Стратегийн харилцаа холбооны зохицуулагч Жон Кирби өнгөрсөн Даваа гарагт хийсэн хэвлэлийн бага хурал дээр “Украиныг НАТО-д элсүүлэхийн тулд “маш их ажил” хийх шаардлагатай бөгөөд энэ асуудлаар эвслийн хүрээнд зөвшилцөхөд багагүй цаг хугацаа орно” гэж мэдэгджээ.
Тэрбээр “АНУ-ын Ерөнхийлөгч Жо Байден “Украин ирээдүйд НАТО-гийн бүрэлдэхүүнд орно гэдэгт итгэлтэй хэвээр байна. Энэ ирээдүй ямар байх нь олон хүчин зүйлээс шалтгаална” гэж мэдэгдсэн байна.
Кирби “Украинд одоо дайн болж байна. Хойд Атлантын холбоо энэ дайнд Украин ялахад туслах ёстой” гэж хэлжээ. Үүний зэрэгцээ тэрбээр НАТО-г “ардчилсан орнуудын холбоо” гэж нэрлэсэн байна.
Үүнтэй холбогдуулан NSS-ийн ажилтан барууны орнууд Украинд “НАТО-гийн гишүүн болохыг хүссэн аливаа ардчилалд шаардлагатай шинэчлэлийг” хийхэд тусалсаар байхыг баталжээ.
Кирби гуравдугаарт, Киев эвсэлд элсэх асуудлыг НАТО-гийн бүх гишүүн дэмжих ёстой, үүнд бас цаг хугацаа шаардагдана” гэж онцолсон байна. Тэрбээр Вашингтонд эхлэх НАТО-гийн дээд хэмжээний уулзалтаар Украиныг НАТО-д элсүүлэх эргэлт буцалтгүй байдлын талаар ярих эсэх, энэ асуудалд АНУ ямар байр суурьтай байгаа талаарх асуултад хариулахаас татгалзжээ.
Кирби “Бидний байр суурь бол Украин ирээдүйд НАТО-гийн гишүүн орон байх ёстой. Ийм хэмжээнд хүрэхийн тулд “маш их ажил хийх” хэрэгтэй” гэж хэлсэн байна.
Түүний хэлснээр, АНУ Киевт “НАТО-д хүрэх зам” байгааг мэдрүүлж, дохио өгсөөр байх бодолтой байгаа аж. Үүнээс гадна АНУ болон эвслийн бусад гишүүд Оросын цэргийн хүчний эсрэг Киевийн батлан хамгаалах чадавхийг бэхжүүлэхийн төлөө зүтгэхээ баталжээ.
Эх сурвалж: TASS
Д.ТУЯА
