ПАРИС ХОТООС МЭДЭЭЛЖ БАЙНА: “Парис-2024″ Зуны XXXIII олимпын наадам өнөөдөр албан ёсоор “ хөшиг”-өө нээнэ. Монголын баг тамирчид өчигдөр байт харваан төрөлд тэмцээнээ эхлүүлсэн бол маргааш манай 5 тамирчин Парисын олимпын наадмын тэмцээнээ эхлүүлнэ.
- С.Жамбалжамц ганцаарчилсан 32.4 км-ын зайн уралдаанаа эхлүүлнэ
Олимпын наадмын ганцаарчилсан 32.4 км-ын уралдааны техникийн зөвлөгөөн боллоо. Дэлхийн шилдэг 34 тамирчны нэрсийг баталж, Ази тивээс зөвхөн Казахстаны Федоров, Монголоос С.Жамбалжамцын нэрийг батлав.
Ганцаарчилсан гараатай тэмцээнд ОУХМ Б.Тэгшбаяр уралдах байсан боловч UCI-ийн шийдвэр өөрчлөгдөв.
Азиас 10-аад орон Олимпын 1 эрх авсан бол Казахстан, Монгол, Япон улсад 2 зайд уралдах 2 эрх олгосон юм.
2. Жүдо бөхийн төрөлд Э.Ариунболд эрэгтэйчүүдийн 60 кг-д, Б.Баасанхүү эмэгтэйчүүдийн 48 кг-д барилдаанаа эхлүүлнэ
Эмэгтэйчүүдийн 48 кг-д Сүлд спорт хороо, Үндэсний шигшээ багийн тамирчин, шинэхэн Ази тивийн болон дэлхийн аварга, ОУХМ Б.Баасанхүү хүч үзнэ. Манай тамирчны жинд 31 бөх байна. Тэрээр эхлээд Мальта улсын бөхтэй. Ялаад Австри, Хятадын Хонгконгийн бөхчүүдийн ялсантай хүч үзнэ.
Эрэгтэйчүүдийн 60 кг-д дэлхийн аваргын мөнгөн медальт, Алдар спорт хороо, Үндэсний шигшээ багийн тамирчин ОУХМ Э. Ариунболд өрсөлдөнө. Манай тамирчны жинд 25 бөх байна. Тэрээр D зоонд эхний барилдаанаа Египтын Сэми Юссритэй. Ялвал Францтай шөвгийн 8 -д үлдэхийн төлөө хүч сорино.
3. ОУХМ Э.Даваахүү тэмцээнээ эхлүүлнэ
Буудлага спортын шигшээ багийн тамирчид Парис-2024 зуны олимпын наадамд өрсөлдөх 3 эрх аваад буй. Маргааш буюу манай цагаар 2024.07.27 ны өдөр Үндэсний шигшээ багийн тамирчин, ОУХМ Э.Даваахүү эрэгтэйчүүдийн 10 метрийн хийн гар бууны төрөлд хүч сорих юм.
4. Боксынхон тэмцээнээ эхлүүлнэ
“Парис 2024”- зуны олимпын наадмын боксын төрлийн сугалаа явагдав. Манай улсаас эмэгтэйчүүдийн 54 кг-ын жинд ОУХМ М.Энхжаргал өрсөлдөнө. Тэрээр эхний даваандаа 2023 оны дэлхийн аварга шалгаруулах тэмцээний мөнгөн медальт Италийн Чараабитай тулалдах юм.
Э.ЭНХ
