Парис хотноо болж буй зуны XXXIII Олимпын Ням гаргийн буюу долдугаар сарын 28-нд болсон тэмцээнд Монголын баг, тамирчдын үзүүлсэн амжилтын талаарх мэдээллийг хүргэж байна.
Жүдо бөхийн эмэгтэйчүүдийн 52 кг-ын жинд Л.Сосорбарам, эрэгтэйчүүдийн 66 кг-ын жинд Ё.Басхүү нар барилдав.
“Парис-2024” Олимпын жүдо бөхийн эрэгтэйчүүдийн 66 кг-ын жинд Монгол Улсын шигшээ багийн тамирчин, Дэлхийн аваргын хошой хүрэл медальт, Азийн аварга Ё.Басхүү дагах барилдаанд дэлхийн аваргын хүрэл медальт Францын Валид Хьяртай барилдсан. Нэмэлт цагт Ё.Басхүү ялагдсанаар долдугаар байраар тэмцээнээ өндөрлүүлэв.
Жүдо бөхийн эмэгтэйчүүдийн 52 кг-ын жинд өрсөлдсөн ОУХМ Л.Сосорбарам Унгар улсын тамирчин Река Пүппд торгуулиар ялагдаж тэмцээнээ өндөрлүүлэв.
Боксын төрөлд эмэгтэйчүүдийн 54 кг-ын жинд М.Энхжаргал, мөн эмэгтэйчүүдийн 50 кг-ын жинд Л.Есүгэн нар өрсөлдөв.
Дэлхийн цомын аварга, Дэлхийн аваргын хүрэл медальт, U22 насны Ази тивийн аварга, ОУХМ М.Энхжаргалын эмэгтэйчүүдийн 54 кг-ын жинд Италийн тамирчин 2023 оны ДАШТ-ний мөнгөн медальт, 25 настай Чарааби Сиринэтэй хийж 5:0 харьцаатайгаар ялалт байгуулсан
Буудлагын төрөлд эрэгтэйчүүдийн хийн урт бууны 10 м-ийн буудлагад Н.Баяраа, эмэгтэйчүүдийн хийн урт бууны мөн 10 м-ийн буудлагад О.Есүгэн, эрэгтэй хийн, урт бууны 10 м-т Э.Даваахүү нар өрсөлдөв.
Эмэгтэйчүүдийн 10 метрийн хийн урт буун дасгалын төрөлд 44 тамирчин өрсөлдсөнөөс О.Есүгэн 627.6 оноогоор 18-р байрт, ОУХМ Н.Баяраа 49 тамирчин өрсөлдсөнөөс 627 оноогоор 29-р байрт тус тус шалгарав.
Усан сэлэлтийн төрөлд эмэгтэйчүүдийн 200 м-ийн зайд ОУХМ Б.Энххүслэн өрсөлдөж, 1:59.94 минутад зайгаа дуусгаснаар 18-р байранд орлоо.
Хоёр дахь олимпдоо оролцож буй тэрбээр хоёрдугаар гараанд уралдаж, 1:59.94 минутад зайгаа дуусган гараандаа зургадугаар байр эзэллээ. Мөн энэ амжилтаараа Монгол Улсын рекордын шинэчлэн тогтоож, олимпын наадмаа өндөрлүүлэв.
Түүний дүү Б.Энхтамир долдугаар сарын 30-ны өдөр эрэгтэйчүүдийн 100 метрийн чөлөөт сэлэлтэд өрсөлдөнө.
Гэрэл зургийг Ч.ГАНБАТ
Э.ЭГШИГЛЭН