Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд өнөөдөр (2024.07.29) товлогдсон “Ногоон автобус”-ны гэх хэргийн гэм буруугийн шүүх хурал өмгөөлөгч нарын гаргасан хүсэлтийн дагуу наймдугаар сарын 12-ны 10:00 цаг хүртэл хойшлов.
Эл хэрэгт УИХ-ын гишүүн асан Ж.Сүхбаатар, Нийслэлийн Засаг даргын ахлах зөвлөх Д.М, Худалдан авах ажиллагааны газрын Мэдээллийн технологийн хэлтсийн дарга Б.Т, Нийтийн тээврийн газрын дарга С.Ж нарын албан тушаалтнууд, том оврын автобусны үйлчилгээ эрхлэгчдийн холбоо, “Тэнүүн-Огоо” ХХК-ийн албан тушаалтнууд болон БНСУ-ын хоёр иргэн нарын нийт 24 хүн холбогдсон.
Прокуророос “Нийслэлийн Засаг даргын Тамгын газар болон Худалдан авах ажиллагааны газрын эрх бүхий албан тушаалтнууд 2023 онд нийслэлийн өмчийн хөрөнгөөр 600 ширхэг автобус худалдан авах ажиллагааг зохион байгуулахдаа хууль зөрчиж, бусдад давуу байдал бий болгосон” гэх уг хэрэгт:
-
- Эрүүгийн хуулийн 22.1 дүгээр зүйлийн 1, 3 (Эрх мэдэл, албан тушаалын байдлаа урвуулан ашиглах),
- 17.3 дугаар зүйлийн 2.2 (Залилах),
- 22.12 дугаар зүйлийн 1 (Хуулийн этгээдийн эрх мэдлийг урвуулан ашиглах)-д зааснаар яллах дүгнэлт үйлдэн Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхэд шилжүүлсэн билээ.
Сануулахад, Нийслэлийн Засаг даргын Тамгын газар болон Худалдан авах ажиллагааны газрын эрх бүхий албан тушаалтнууд 2023 онд нийслэлийн өмчийн хөрөнгөөр 600 ширхэг автобус худалдан авах ажиллагааг зохион байгуулахдаа хууль зөрчиж, бусдад давуу байдал бий болгосон, мөн автобусуудыг үйлдвэрийн технологийн бус аргаар угсарч хийснийг хуулийн байгууллага тогтоосон.
Хууль бус дээрх үйлдлээс болж нийт 134.5 тэрбум төгрөгийн хохирол учирсан бөгөөд үүнээс мөрдөгчид 11.9 тэрбум төгрөгийг төлүүлж, 71.7 тэрбум төгрөгийн хөрөнгийг битүүмжлэн хамгаалжээ.
Э.ЭГШИГЛЭН
