Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүхийн санаачилгаар Хөвсгөл нуурын эко системийг хамгаалах, нуурын ёроолын аюултай хог хаягдлыг цэвэрлэх, бохирдлыг бууруулах зорилгоор живсэн тээврийн хэрэгслийг илрүүлэх, байршлыг тогтоох, татан гаргах ажил Хөвсгөл нуурын Марааны буланд үргэлжилж буй юм.
Тус ажиллагааг ОБЕГ-ын тэргүүн дэд дарга бөгөөд штабын дарга, бригадын генерал Ж.Чүлтэмсүрэн ахалж байгаа бөгөөд ажлын хэсэгт ОБЕГ, ЗХЖШ, тэдгээрийн холбогдох чиг үүрэг бүхий анги, салбаруудын алба хаагчид болон Шинжлэх ухаан, технологийн их сургууль, Үндэсний батлан хамгаалахын их сургуулийн эрдэмтэд, цэргийн зөвлөх инженерүүд ажиллаж байгаа аж.
Ажлын хэсгийн бүрэлдэхүүн 44 жилийн өмнө буюу 1980 оны 4 дүгээр сард Хөвсгөл нуурын Дүбэрлэг уул, Хэрээний үүр орчимд живсэн УАЗ-469 загварын автомашиныг 171 метрийн гүнээс тусгай техник хэрэгсэл ашиглан, амжилттай татан гаргажээ.
Монгол Улсын Ерөнхийлөгч У.Хүрэлсүх цахим хуудастаа “Хөвсгөл нуурыг цэвэрлэх ажил амжилттай үргэлжилж байгаад баяртай байна. 1980 онд буюу 44 жилийн өмнө Хөвсгөл нуурт живсэн УАЗ-469 загварын автомашиныг 171 метрийн гүнээс татан гаргасан ОБЕГ-ын алба хаагчдад талархал илэрхийлж, баяр хүргэе. Ажлын улам өндөр амжилт хүсье” гэж бичсэн байна.
Э.ЭГШИГЛЭН
