“Хааны эрэлд 2024” энхийг дэмжих ажиллагааны олон улсын сургууль 6 дахь өдрөө амжилттай үргэлжилж байна. Одоо явагдаж буй салаадын хээрийн сургуулиар оролцогч орны цэргүүд хичээлийн 10 цэгт сургалт, дадлагад хамрагдаж байгаа аж.
Сургуулийн явцад орон орны дайчдын соёлын өдөрлөг болдог уламжлалтай. Энэ хүрээнд Япон, БНСУ-ын соёлын өдөрлөг болж, тухайн орны цэргийн алба хаагчид өөрсдийн өв соёлыг сурталчилж, үндэсний тулааны урлагийн үзүүлэн тоглолтыг сонирхуулжээ.
Оролцогч орны цэргүүд энэхүү өдөрлөгөөр өөрсдийн хийсэн цаасан тоглоом, аз жаргалт, амжилт ерөөсөн ханзыг дурсгал болгон хадгалсны зэрэгцээ дээрх улсуудын уламжлалт хоол болон цайны соёлтой танилцдаг байна.
Соёлын өдөрлөг нь өөрсдийн үндэстний онцлогийг сурталчлан таниулахаас гадна сургуульд оролцогч орнуудын цэргийн алба хаагчид ойр дотно нөхөрлөх, сургалт бэлтгэлээс авсан ачааллаа хөнгөвчлөх боломж олгодог ажээ.
Хуваарийн дагуу өнөөдөр (2024.08.01) Зэвсэгт хүчний Сургалтын нэгдсэн төвд 20.00 цагт БНХАУ-ын Соёлын өдөрлөг болох юм байна.
Х.НУРЖАН