Наймдугаар сарын 6-ны байдлаар Дархан, Сэлэнгийн чиглэлд Сэлэнгэ, Хараа, Орхон гол үертэй байна. Хэнтий аймгийн Дадал сум орчимд Онон голын усны түвшин өмнөх өдрийнхөөс 20-30 см нэмэгджээ.
Мөн Босгын гүүр-Улаанбаатар-Алтанбулаг болон Лүн сумын чиглэлд Туул гол үерийн аюултай түвшинг давсан талаар цаг уурын байгууллагаас мэдээллээ.
Дорнод, Эрээнцав орчимд Эг, Улз гол, Хонгон-Чойбалсан чиглэлд Хэрлэн гол үерийн түвшинг 5-35 см давж, үерийн аюултай түвшинд хүрсэн байна.
Түүнчлэн Мөнгөнморьт-Багануур-Өндөрхаан чиглэлд Хурх, Барх, Онон, Балж, Хэрлэн гол хүчтэй үерлэжээ.
Маргааш буюу наймдугаар сарын 07-нд Сэлэнгэ мөрөн Орхон голын дунд болон адаг хэсгээр усны түвшин 5-20 см, Хэрлэн гол Өндөрхаан-Чойбалсан хот орчимд 5-15 см тус тус нэмэгдэх хандлагатай байгааг Цаг уур, орчны шинжилгээний газраас анхааруулж байна.
Иймд жолооч тээвэрчид та бүхэн орон нутгийн замд зорчихдоо үер усны аюулаас урьдчилан сэргийлж, анхаарал болгоомжтой зорчино уу.
