“Парис-2024” зуны XXXIII Олимпын наадам 18 хоногийн турш үргэлжилж, 329 багц медалийн эзэд тодорч, олон сонирхолтой үйл явдал өрнөв. Өнгөрсөн Ням гарагт болсон наадмын хаалтын ёслол хамгийн өндөр төсөвтэй болжээ.
Холливудын кино од Том Круз Францын “Стад де Франс” үндэсний цэнгэлдэх хүрээлэнд агаараас буун ирж, Олимпын далбааг гардан аваад, дараагийн олимпыг зохион байгуулах Лос-Анжелес хотод гардуулан өгч, Парисын наадмын хаалтын ёслол болсон талаар “Reuters” агентлаг мэдээллээ.
“DW”-д мэдээлснээр, ёслолын үеэр Олимпын цагиргуудыг дээш хөөргөх зэрэг олон шоу үзүүлбэр толилуулжээ. Францын Phoenix, Air хамтлагууд ая дуугаа өргөсний дараа 2028 оны наадмыг зохион байгуулах Лос–Анжелес хотод Олимпын далбааг гардуулах ёслолын үеэр АНУ-ын дуучин H.E.R Америкийн төрийн дууллыг эгшиглүүлсэн байна.
Америкийн од жүжигчин Том Круз агаараас бууж ирэн, АНУ-ын баг тамирчидтай мэндчилж, гимнастикч Симона Байлзаас Олимпын тугийг авч, мотоциклтой хурдлан давхив. Тэрбээр далбааг домогт сагсан бөмбөгч Майкл Жордан тэргүүтэй тамирчдын тусламжтайгаар Лос-Анжелест аваачиж буй дүрс бичлэгийг үзүүлжээ.
Лос-Анжелесын Венисийн эрэг дээр “Red Hot Chili Peppers”, Билли Айлиш, Снуп Догг, Доктор Дре нарын Калифорниос гаралтай уран бүтээлч уран бүтээлээ толилуулсан байна.
“Парис-2024” зуны XXXIII Олимпын наадмын хаалтын ёслолын гэрэл зургуудыг
“Reuters” агентлаг онцлов.
Эх сурвалж: REUTERS, DW
Д.ТУЯА
