Цагдаагийн ерөнхий газраас Олон Улсын Эрүүгийн цагдаагийн байгууллага-Интерполын “Улаан булант” зар мэдээгээр олон улсын хэмжээнд эрэн сурвалжлагдаж байсан Монгол Улсын иргэн М-г Бүгд Найрамдах Хятад Ард Улсаас шилжүүлэн авчирсан байна.
Уг этгээд 2019 онд бусдыг залилан мэхэлж, онц их хэмжээний хохирол учруулсан хэрэгт шалгагдаж байгаад, 2023 онд гадаад улсад оргон зайлжээ.
Түүнийг Тайландын Хаант Улсаар дамжин, БНХАУ-ын ӨМӨЗО-ы Хөх хотод байх үед нь тус улсын Нийгмийг аюулаас хамгаалах яам болон Интерполын Үндэсний төв товчоотой хамтран ажилласны үр дүнд энэ оны наймдугаар сарын 8-ны өдөр саатуулан баривчилсан байна.
Дээрх этгээдийг Монгол Улсад шилжүүлэн авчрах ажиллагааг энэ оны наймдугаар сарын 14-ний өдөр ХЗДХЯ, ГХЯ, УЕПГ, ЦЕГ-ын Интерполын Үндэсний төв товчоо, ЭЦГ хамтран зохион байгуулжээ.
Э.ЭГШИГЛЭН
