Гамшгаас сэргийлэх чиглэлээр Монгол Улсын Шадар сайд, Боловсролын сайд нарын хамтарсан тушаал гарган, бүх шатны боловсролын байгууллагуудад хэрэгжүүлэхээр боллоо.
Манай улсад сүүлийн 3 жилд гамшиг, аюулт үзэгдэл, ослын нийт 12,881 дуудлага мэдээлэл бүртгэгдэж 2702 хүн нас барж, 111 тэрбум төгрөгийн хохирол учирсан бөгөөд Онцгой байдлын байгууллагаас 16,417 хүний амь насыг аварч 774,0 тэрбум төгрөгийн өмч хөрөнгийг авран хамгаалсан байна.
Байгалийн гамшигт үзэгдэл болон хүний буруутай үйл ажиллагаанаас шалтгаалсан аюул, ослын тоо жил ирэх тусам нэмэгдсээр байгаа тул Үндэсний сөрөн тэсвэрлэх чадавхыг бэхжүүлэх, Гамшгийн үеийн бэлэн байдлыг хангах, болзошгүй эрсдэлээс урьдчилан сэргийлэх, хариуцлагатай иргэнийг бэлдэхэд бүх шатны боловсролын байгууллагуудын оролцоо нэн чухал.
Энэ хүрээнд Монгол Улсын Шадар сайд, УОК-ын дарга С.Амарсайхан өнөөдөр (2024.09.02) Боловсролын сайд П.Наранбаяр, ОБЕГ-ын дарга, хошууч генерал Г.Ариунбуян нартай уулзаж, гамшгаас сэргийлэх чиглэлээр бүх шатны боловсролын байгуулагуудад хэрэгжүүлж буй “Аюулгүй амьдрах ухаан” сургалтын хөтөлбөрт үнэлэлт дүгнэлт хийх, цаг үеийн шаардлагад нийцүүлэн илүү боловсронгуй болгох, талуудын оролцоог жигд хангах асуудлаар хамтарсан тушаал гаргаж хэрэгжүүлэхээр боллоо.