Владимир Зеленский “Хойд Солонгос ОХУ-ын зэвсэгт хүчинд Украины эсрэг тулалдахад нь туслах зорилгоор иргэдээ илгээж, Москва болон нууцлаг улс хоорондын талаарх санаа зовоосон асуудлыг улам бүр нэмэгдүүлж байна” гэж мэдэгджээ.
Украины Ерөнхийлөгч өнгөрсөн Ням гарагт өдөр тутмын видео илгээлтээ хийж, “Бид Орос болон Хойд Солонгос зэрэг дэглэмүүдийн хоорондын холбоо улам бүр нэмэгдэж байгааг харж байна. Энэ нь зөвхөн зэвсэг шилжүүлэх тухай бус, үнэндээ Хойд Солонгосоос хүмүүсийг цэргийн хүчнээр шилжүүлэх тухай асуудал юм” гэж хэлжээ.
Зеленский Москва, Пёньяны найрсаг харилцаа улам бүр нэмэгдэж буй үед ийн мэдэгдэл гаргав.
ОХУ-ын Ерөнхийлөгч Владимир Путин өнгөрсөн зургадугаар сард, 20 гаруй жилийн дараа Хойд Солонгост айлчилсан бөгөөд барууны ажиглагчид “Хойд Солонгос ОХУ-д Украин руу довтлоход нь хэр их тусламж үзүүлсэн бол” хэмээн гайхширч байгаа аж.
Зеленский “Мэдээж ийм нөхцөлд түншүүдтэйгээ харилцаагаа хөгжүүлэх хэрэгтэй. Фронтын бүсэд илүү их дэмжлэг хэрэгтэй” гэж нэмж хэлээд, барууны орнуудад хандан “Киевт Оросын нутаг дэвсгэрт алсын тусгалтай пуужин ашиглахыг зөвшөөрөх”-ийг гуйж буйгаа дахин илэрхийлжээ.
Украины тагнуулын албаны нэрээ хэлэхийг хүсээгүй эх сурвалж өнгөрсөн долоо хоногт CNN-д “Хойд Солонгосын цөөн тооны иргэд Оросын зэвсэгт хүчинд голдуу инженерийн чиглэлээр тусалж, Хойд Солонгосын сум ашиглах, мэдээлэл солилцох зорилгоор хамтран ажиллаж байна. Тэдний зарим нь саяхан Украины зүүн нутагт амиа алдсан” гэж мэдээлжээ.
Кремлийн хэвлэлийн төлөөлөгч Дмитрий Песков өнгөрсөн Пүрэв гарагт ‘Хойд Солонгосын ажилтнуудыг ОХУ-ын зэвсэгт хүчинд туслуулахаар илгээсэн’ гэх мэдэгдлийг “Бас нэг хууран мэхлэлт” хэмээн үгүйсгэсэн байна.
Гэвч үйл явдлыг хянаж байгаа Өмнөд Солонгосын Үндэсний тагнуулын албанаас өнгөрсөн долоо хоногт дээрх мэдээллийг үнэн гэж үзэж байгаа талаараа мэдэгджээ.
БНСУ-ын Батлан хамгаалахын сайд Ким Ён Хён өнгөрсөн Мягмар гарагт парламентын хуралдаан дээр “Янз бүрийн нөхцөл байдлыг харгалзан үзвэл Украинд Хойд Солонгосын офицер, цэргүүд амиа алдсан гэх мэдээлэл үнэн байх магадлал өндөр байна” гэж хэлжээ.
Тэрбээр “Орос, Хойд Солонгос хоёр цэргийн эвсэлтэй бараг дүйцэхүйц харилцан тохиролцоонд хүрсэн тул цаашид байнга цэргээ оруулах боломж маш өндөр байна гэж бид үзэж байна. Иймд бид ч гэсэн үүнд сайтар бэлдэнэ” гэж нэмж хэлсэн байна.
Олон засгийн газар Пёньяныг Украинд хийж буй дайнд зориулж Москвад зэвсэг нийлүүлсэн гэж буруутгаж байгаа ч хоёр улс үүнийг эрс үгүйсгэж байгаа аж.
Путиныг өнгөрсөн зургадугаар сард Хойд Солонгосын нийслэлд айлчлах үеэр хоёр улс аль нэг нь халдлагад өртсөн тохиолдолд яаралтай цэргийн тусламж үзүүлэхийн тулд боломжтой бүх арга хэрэгслийг ашиглахаа амалсан нь дарангуйлагч улсуудын тохиролцсон батлан хамгаалах гэрээний чухал хэсэг юм.
Путин айлчлалынхаа үеэр “Хоёр улс харилцаагаа шинэ шатанд гаргаж байна” гэж хэлсэн.
БНАСАУ-ын удирдагч Ким Жон Ун хоёр талын хэлэлцээний өмнө хэлсэн үгэндээ “Оросын Засгийн газар, зэвсэгт хүчин, ард түмний тэмцлийг бүрэн дэмжиж, эв санааны нэгдэлтэй байгаагаа” илэрхийлээд, “өөрийн бүрэн эрх, нутаг дэвсгэрийн аюулгүй, тогтвортой байдлыг хамгаалах”-ын төлөө тэмцэж буй Москвагийн Украинд явуулж буй дайныг онцгойлон дурджээ.
Эх сурвалж: CNN
Д.ТУЯА
