Казахстан Улсын Шымкент хотод шатрын эмэгтэйчүүдийн 2024-2025 оны цуврал гранпри тэмцээн аравдугаар сарын 30-аас арваннэгдүгээр сарын 9-ний өдрүүдэд болно.
Үүнд манай улсаас их мастер, гавьяат тамирчин, Үндэсний шигшээ багийн тамирчин Батхуягийн Мөнгөнтуул өрсөлдөх юм. Тэрбээр өмнө нь хоёр (2009-2010, 2011-2012) цуврал тэмцээнд оролцохдоо зургаа болон наймдугаар байрт орж байв.
Түүний хувьд “ФИДЕ” гранд свисс тэмцээнд дөрөвдүгээр байр эзлэн энэ жилийн гранприд оролцох эрхээ авчээ.
Тэмцээнд шилдэг арван шатарчин тойргоор өрсөлдөх аж. Нийт зургаан цуврал тэмцээний үр дүнгээр гранпри тэмцээний цомын эзнийг тодруулна. Улмаар нэг тамирчин гуравт нь оролцох эрхтэй ажээ.
Тус тэмцээнд Монголоос хамгийн өндөр амжилт үзүүлсэн тамирчин нь их мастер, гавьяат тамирчин Т.Батчимэг юм. Түүний хувьд 2012-2013 оны цувралд тавдугаар байр эзэлж байв.
