Согтууруулах ундаа хэрэглэсэн үедээ төрсөн ахыгаа хэрцгийгээр зодож хөнөөжээ

Чингэлтэй дүүргийн …дугаар тоотод оршин суудаг иргэн О архи согтууруулах ундаа хэрэглэсэн үедээ төрсөн ахыгаа “Ажил хийсэнгүй, ээжид мөнгө төгрөг өгсөнгүй” гэх шалтгааны улмаас зодож, хөнөөсөн хэрэг гарчээ. Хэрэг үйлдсэн этгээд шүүхэд өгсөн мэдүүлэгтээ “Би ахтайгаа маргалдаагүй, болсон явдлыг санахгүй байна” гэсэн байна.

Харин гэрчүүдийн мэдүүлэг болоод цагдаагийн газраас хийсэн мөрддөг, шүүх шинжилгээний дүгнэлт зэрэг нь хэрэг үйлдсэн болохыг нотолжээ.

Улмаар шүүх байгууллагаас Эрүүгийн хуулийн тусгай ангийн 10.1 дүгээр зүйлийн 1 дэх хэсэгт зааснаар 12 жилийн хугацаагаар хорих  ял оногдуулжээ.

Холбогдсон хэргийн хуулийн заалт

Эрүүгийн хууль 10.1 дүгээр зүйл. Хүнийг алах

1.Хүнийг алсан бол найман жилээс арван таван жил хүртэл хугацаагаар хорих ял шийтгэнэ.

2.Хүнийг:

• 2.1.онц харгис хэрцгийгээр;
• 2.2.олон хүний амь бие, эрүүл мэнд, эд хөрөнгөд хохирол учруулж болох аргаар;
• 2.3.захиалгаар;
• 2.4.өөр гэмт хэргийг нуун далдлах, хялбарчлах зорилгоор;
• 2.5.өөртөө, бусдад эдийн, эдийн бус ашигтай байдал бий болгох зорилгоор;
• 2.6.хоёр, түүнээс олон хүнийг;
• 2.7.хохирогчийн биеэ хамгаалж чадахгүй, жирэмсэн болохыг мэдсээр байж;
• /Энэ заалтын "бага насны хүүхэд," гэснийг 2023 оны 12 дугаар сарын 07-ны өдрийн хуулиар хассан./
• 2.8.гэр бүлийн хүчирхийлэл үйлдэж;
• 2.9.эрхэлж байгаа ажил, албан үүрэгтэй нь холбогдуулж өөрийг нь, түүний ойр дотны хүнийг;
• 2.10.зохион байгуулалттай гэмт бүлгийн гишүүн зохион байгуулалттай гэмт үйл ажиллагааныхаа явцад;
• 2.11.бүлэглэж;
• 2.12.эрүүдэн шүүж;
• 2.13.цус, эд, эрхтнийг авах зорилгоор;
• 2.14.үзэл бодол, арьсны өнгө, үндэс, угсаа, шашин шүтлэг, бэлгийн, хүйсийн чиг баримжаагаар нь үзэн ядаж алсан бол арван хоёр жилээс хорин жил хүртэл хугацаагаар, эсхүл бүх насаар нь хорих ял шийтгэнэ.