Харри Поттерын тухай шинэ цувралд ямар жүжигчид дүр бүтээх вэ?

Өнгөрсөн жил стриминг үйлчилгээний HBO Max платформын зүгээс шидтэн хүү Харри Поттерын тухай цуврал хийх болсон талаараа мэдээлсэн. Ийнхүү тус мэдээ цацагдсанаас хойш "Гол дүрд ямар жүжигчид тоглох бол?" гэсэн асуулт цувралын үнэнч шүтэн бишрэгчдийн дунд халуун ярианы сэдэв болж эхэлсэн билээ. Харин HBO-гийн зүгээс өнгөрсөн есдүгээр сард Харри, Хермайни болон Рон нарын дүрд сонгон шалгаруулалт зарласан бөгөөд 32,000 гаруй хүүхэд өргөдлөө илгээгээд байгаа аж. Бусад дүрд тоглох жүжигчдийн нэрс одоогоор нууц хэвээр байгаа ч Deadline вэбсайтын зүгээс Харри Поттер цувралд дүр бүтээх өндөр магадлалтай жүжигчдийн жагсаалтыг дэлгэсэн байна. 

Тодруулбал, The Lazarus Project, I May Destroy You зэрэг бүтээлүүдээрээ олонд танигдсан залуу жүжигчин Паапа Эссиеду профессор Северус Снейпийн дүрд тоглох саналыг хүлээн авсан гэх цуурхал аль хэдийн олон нийтийн дунд тархжээ. Харин Рубеус Хагридын дүрд Game of Thrones цувралаараа алдартай жүжигчин Марк Адди тоглох өндөр магадлалтай байгаа гэнэ. 

Паапа Эссиеду

Марк Адди

Цаашлаад Харри Поттерын гол дайсан Волдемортын дүрд Оскарын шагналт жүжигчин Киллиан Мерфи тоглож магадгүй хэмээн үзэгчид таамаглаж байгаа аж. Энэ талаар Харри Поттер киноны анхны хувилбарт Волдемортын дүрийг бүтээж байсан жүжигчин Рэйф Файнс Watch What Happens Live With Andy Cohen нэвтрүүлэгт оролцож байхдаа ярьсан бөгөөд тэрбээр "Киллиан Мерфи бол гайхалтай жүжигчин. Хэрвээ тэр Волдемортын дүрд тоглоно гэвэл би чин сэтгэлээсээ дэмжих болно оо" хэмээжээ. 

Киллиан Мерфи

Эдгээр дүрийн сонголт нь албан ёсоор батлагдаагүй ба зөвхөн нийгмийн сүлжээнд яригдаж буй таамаг гэдгийг дахин сануулъя. Түүнчлэн цувралын зураг авалт 2026 онд эхлэх төлөвлөгөөтэй байгаа бөгөөд 2027 онд үзэгчдийн хүртээл болохоор товлогдоод байгаа юм. 

Эх сурвалж: Buro Mongolia