Т.Мөнхсайхан: "Хавдар судлалын төв 2"-ыг барихад  4-5 жилийн хугацаа шаардах байх

Ерөнхийлөгчийн өчигдөр (2024.12.16) гаргасан захирамжийн дагуу ажлын хэсэг байгуулжээ. Уг ажлын хэсэг нь Хавдар судлалын төв 2-ыг байгуулахад дэмжлэг үзүүлэх бөгөөд Ерөнхийлөгчийн ахлах зөвлөх Н.Хүрэлбаатар ахлах аж. Энэ хүрээнд Ерөнхийлөгчийн Тамгын газраас "Хавдар судлалын үндэсний төв II"-ийг барих асуудлаар өнөөдөр мэдээлэл өглөө.  

Энэхүү шинэ эмнэлэг нь СХД-ийн нутаг дэвсгэрт байгуулах 95,308 мкв бүхий хавдрын эрт үед илрүүлэх, үзлэг оношилгоо явуулах, эмчлэх, судалгаа шинжилгээ явуулах эрүүл мэндийн цогцолбор төв байх юм. 2025оны төсөвт дэд бүтцийн асуудлыг шийдвэрлэхээр хөрөнгө мөнгийг тусгасан.

Мөн энэ үеэр Эрүүл мэндийн сайд Т.Мөнхсайхан дараах мэдээллийг өгсөн юм. Тэрбээр, "Манай улсын хувьд хавдрын нөхцөл байдал хүнд байгааг хүн бүр мэдэж байгаа. Шинээр "Хавдар судлалын төв 2"-ыг барихад  4-5 жилийн хугацаа шаардах байх. Энэ хугацаанд одоо тусламж үзүүлж байгаа ХСҮТ-ийг өргөтгөж, тусламж үйлчилгээг сайжруулах зайлшгүй шаардлага гарч байгаа. Тиймээс ирэх оны төсөвт шаардлагатай төсөв мөнгийг тусгасан.

Мөн шинээр Хавдар судлалын төв 2-ыг барьж байгуулахад онцгой анхаарч, дэмжиж ажиллаж байгаа Ерөнхийлөгч У.Хүрэлсүхэд талархаж байгаагаа илэрхийлье" гэлээ.

 

Үргэлжлүүлэн УИХ-ын гишүүн Ж.Чинбүрэн: Ажлын хэсгийг байгуулж, өөрийн ивээлдээ авсан Ерөнхийлөгчид юун түрүүнд талархаж байна. Шинэ эмнэлэг барих хүртэл хавдрын ачааллаа бууруулах зорилгоор ирэх оны төсөвт 17 тэрбум төгрөгийг тусгасан. Энэ хүрээнд одоо ажиллаж байгаа хавдрын эмнэлгийг өргөтгөх, өөр бэлэн байгаа эмнэлгийг авч агшиглах чиглэлд ажиллаж эхэлсэн. Мөн шинээр баригдах Хавдар судалын төв-2 бол зүгээр эмнэлэг биш, цогцолбор төв байна. Монгол хүн дэлхийн жишигт хүрсэн үйлчилгээг, орчин үеийн тоног төхөөрөмжөөр авах боломж бүрдэнэ. Үргэлжлээд боловсон хүчин бэлтгэх ажлууд төлөвлөгөөний дагуу явж байна" гэсэн юм.